ການເຈລະຈາກ່ຽວກັບເຂດການຄ້າເສລີຈີນ ຍີ່ປຸ່ນແລະ ສ.ເກົາຫຼີ ເທື່ອທີ 11 ຈັດຂຶ້ນຢູ່ນະຄອນຫຼວງປັກກິ່ງ

ກະຊວງການຄ້າຈີນໃຫ້ຮູ້ວ່າ:ການເຈລະຈາກ່ຽວກັບເຂດການຄ້າເສລີຈີນ ຍີ່ປຸ່ນແລະ ສ.ເກົາຫຼີ ເທື່ອທີ 11 ໄດ້ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 11 ມັງກອນນີ້ ໂດຍຈະແລກປ່ຽນຄວາມຄິດຄວາມເຫັນຢ່າງເລິກເຊິ່ງກ່ຽວກັບການຄ້າສິນຄ້າ, ການຄ້າການບໍລິການ,ການລົງທຶນແລະຫົວຂໍ້ທີ່ສຳຄັນອື່ນໆອີກຈຳນວນໜຶ່ງ.

ການເຈລະຈາກ່ຽວກັບເຂດການຄ້າເສລີຈີນ,ຍີ່ປຸ່ນແລະ ສ.ເກົາຫຼີ ໄດ້ເລີ່ມຂຶ້ນໃນເດືອນພະຈິກປີ 2012 ໂດຍໃນປັດຈຸບັນເປັນເທື່ອທີ 11 ແລ້ວ. ທັງສາມຝ່າຍລ້ວນແຕ່ເຫັນວ່າ, ການສ້າງເຂດການຄ້າເສລີຈີນ,ຍີ່ປຸ່ນແລະ ສ.ເກົາຫຼີ ມີຜົນດີຕໍ່ການເສີມຂະຫຍາຍບົດບາດທີ່ມີລັກສະນະຊ່ວຍຊູຍູ້ໜູນກັນລະຫວ່າງອຸດສາຫະກຳສາມປະເທດຢ່າງເຕັມສ່ວນ ທັງເປັນການພັດທະນາແລະຍົກລະດັບຄວາມສາມາດດ້ານການຄ້າແລະການລົງທຶນຂອງສາມປະເທດ, ຊຸກຍູ້ການເຊື່ອມໂຍງຄຸນຄ່າເຂົ້າກັນໃນພາກພື້ນຕື່ມອີກ ທັງສອດຄ່ອງກັບຜົນປະໂຫຍດຂອງສາມປະເທດ ແລະເປັນຜົນດີຕໍ່ການພັດທະນາແລະຄວາມຈະເລີນຮຸ່ງເຮືອງຂອງພາກພື້ນນີ້.

ໃນເດືອນພະຈິກປີ 2015, ຜູ້ນຳສາມປະເທດໄດ້ອອກຖະແຫຼງການຮ່ວມ ໂດຍໄດ້ຢ້ຳຈະພະຍາຍາມເລັ່ງການເຈລະຈາກ່ຽວກັບເຂດການຄ້າເສລີສາມປະເທດໃຫ້ໄວຕື່ມອີກ ເພື່ອບັນລຸການເຊັນສັນຍາເຂດການຄ້າເສລີຢ່າງຮອບດ້ານ,ລະດັບສູງແລະຕ່າງຝ່າຍຕ່າງມີຜົນປະໂຫຍດ.