ຕອນເຊົ້າວັນທີ 15 ມັງກອນນີ້, ທ່ານສີຈິ້ນຜິງ ປະທານປະເທດຈີນໄດ້ເດີນທາງອອກຈາກນະຄອນຫຼວງປັກກິ່ງດ້ວຍເຮືອບິນພິເສດ, ເພື່ອຢ້ຽມຢາມສວິສທາງລັດຖະກິດ ຕາມການເຊື້ອເຊີນຂອງຄະນະກຳມະການສະຫະລັດສວິສທີ່ມີທ່ານນາງໂດຣິສ ລິວດ໌ຮັດເປັນປະທານ; ແລະເຂົ້າຮ່ວມກອງປະຊຸມປະຈຳປີ 2017 ຂອງເວທີປຶກສາຫາລືເສດຖະກິດໂລກທີ່ຈັດຂຶ້ນຢູ່ດາວົສ ຕາມການເຊື້ອເຊີນຂອງທ່ານຄຼາວສ໌ ສວາບ ຜູ້ສ້າງເວທີປຶກສາຫາລືເສດຖະກິດໂລກທັງເປັນປະທານບໍລິຫານງານ; ພ້ອມທັງຢ້ຽມຢາມສຳນັກງານໃຫຍ່ອົງການສະຫະປະຊາຊາດທີ່ເຊີແນວ ຕາມຄຳເຊີນຂອງທ່ານອັນໂຕນິອໍ ກຸເຕີເຣັສ ເລຂາທິການໃຫຍ່ອົງການສະຫະປະຊາຊາດ, ຢ້ຽມຢາມອົງການອະນາໄມໂລກຫຼື WHO ຕາມຄຳເຊີນຂອງທ່ານນາງ ດຣ.ມາກາເຣັດ ຈັນ ແລະຢ້ຽມຢາມຄະນະກຳມາທິການໂອລິມປິກສາກົນ ຕາມຄຳເຊີນຂອງທ່ານໂທມັສ ບັຣ ປະທານຄະນະກຳມາທິການໂອລິມປິກສາກົນ.
ຜູ້ທີ່ໄປຢ້ຽມຢາມນຳທ່ານສີຈິ້ນຜິງມີ ນາງເຜິງຫຼີຢວນ ພັນລະຍາຂອງທ່ານສີຈິ້ນຜິງ, ທ່ານຫວາງຮູ້ໜິງ ກຳມະການກົມການເມືອງສູນກາງພັກກອມມູນິດຈີນທັງເປັນຫົວໜ້າຫ້ອງການຄົ້ນຄວ້ານະໂຍບາຍສູນກາງ, ທ່ານຫຼີ້ຈ້ານຊູ່ ກຳມະການກົມການເມືອງສູນກາງພັກກອມມູນິດຈີນ ເລຂາທິການສູນກາງພັກ ຫົວໜ້າຫ້ອງວ່າການສູນກາງ ແລະທ່ານຢາງເຈຍຊື ທີ່ປຶກສາແຫ່ງລັດ.