ທ່ານສີຈິ້ນຜິງ ປະທານປະເທດຈີນໄດ້ເດີນທາງເຖິງເມືອງຊູຣິສດ້ວຍເຮືອບິນພິເສດໃນວັນທີ 15 ມັງກອນນີ້ເພື່ອຢ້ຽມຢາມສະຫະພັນສະວິສທາງລັດຖະກິດ.
ທ່ານສີຈິ້ນຜິງໄດ້ສົ່ງຄວາມຢ້ຽມຢາມຖາມຂ່າວຢ່າງຈິງໃຈແລະຄຳອວຍພອນອັນປະເສີດຂອງປະຊາຊົນຈີນມາສູ່ປະຊາຊົນສະວິສ ແລະກ່າວວ່າ: ຕະຫຼອດໄລຍະ 67 ປີທີ່ຈີນ-ສະວິສສ້າງສາຍພົວພັນທາງການທູດເປັນຕົ້ນມາ, ການຮ່ວມມືລະຫວ່າງສອງປະເທດໃນວຽກງານສາກົນຕ່າງໆໄດ້ເຂົ້າສູ່ລວງເລິກຢ່າງບໍ່ຢຸດຢັ້ງໂດຍສະເພາະເມື່ອປີ 2016 ຜ່ານມາ, ຈີນ-ສະວິສໄດ້ສ້າງຕັ້ງສາຍພົວພັນຄູ່ຮ່ວມຍຸດທະສາດປະດິດສ້າງເຊິ່ງສ່ອງແສງໃຫ້ເຫັນເຖິງການພົວພັນສອງຝ່າຍໄດ້ເຂົ້າສູ່ໄລຍະພັດທະນາໃໝ່. ຂ້າພະເຈົ້າຫວັງຈະລົງເລິກແລກປ່ຽນຄວາມຄິດເຫັນກັບຜູ້ນຳແລະວົງການຕ່າງໆກ່ຽວກັບສາຍພົວພັນສອງຝ່າຍແລະບັນຫາທີ່ສອງຝ່າຍສົນໃຈຮ່ວມກັນແລະຫວັງວ່າການຢ້ຽມຢາມເທື່ອນີ້ຈະຊຸກຍູ້ສາຍພົວພັນຈີນ-ສະວິສຂະຫຍາຍຕົວ ສູ່ລະດັບສູງກວ່າເກົ່າ ທັງຮ່ວມກັນປະກອບສ່ວນທີ່ສ້າງສັນເພື່ອສົ່ງເສີມເສດຖະກິດໂລກໃຫ້ຟື້ນຕົວ ແລະເຊື່ອໝັ້ນວ່າ ຈາກຄວາມພະຍາຍາມຂອງສອງຝ່າຍແລະພາກສ່ວນກ່ຽວຂ້ອງ, ການຢ້ຽມຢາມເທື່ອນີ້ຈະປະສົບຜົນສຳເລັດແນ່ນອນ.
ຫຼັງເດີນທາງເຖິງເມືອງຊູຣິສ, ທ່ານສີຈິ້ນຜິງຈະເດີນທາງໄປຢ້ຽມຢາມນະຄອນຫຼວງແບັກດ້ວຍຂະບວນລົດໄຟພິເສດຂອງລັດຖະບານສະວິສ, ຈາກນັ້ນຈະເດີນທາງໄປເຂົ້າຮ່ວມກອງປະຊຸມເວທີປຶກສາຫາລືເສດຖະກິດໂລກດາວົສ2017 ທັງຈະຢ້ຽມຢາມສຳນັກງານໃຫຍ່ອົງການສະຫະປະຊາຊາດປະຈຳເຊີແນວ, ອົງການອະນາໄມໂລກແລະຄະນະກຳມະການໂອລິມປິກສາກົນອີກດ້ວຍ.