ພິທີເປີດກອງປະຊຸມເວທີປຶກສາຫາລືເສດຖະກິດໂລກ2017ໄດ້ຈັດຂຶ້ນຢູ່ສູນປະຊຸມສາກົນດາວົສ ປະເທດສະວິສໃນວັນທີ 17 ມັງກອນນີ້ ແລະໃນໂອກາດດັ່ງກ່າວ,ທ່ານສີຈິ້ນຜິງ ປະທານປະເທດຈີນໄດ້ກ່າວປາຖະກະຖາໃນຫົວຂໍ້ "ຮ່ວມຮັບຜິດຊອບຍຸກສະໄໝແລະພັດທະນາທົ່ວໂລກ".
ໃນການປາຖະກະຖາດັ່ງກ່າວ, ທ່ານສີຈິ້ນຜິງຊີ້ວ່າ: ເສດຖະກິດໂລກາພິວັດເປັນຄວາມຮຽກຮ້ອງຕ້ອງການຢ່າງພາວະວິໄສຂອງການພັດທະນາກຳລັງການຜະລິດໃນສັງຄົມແລະເປັນຜົນປະໂຫຍດທີ່ສຳຄັນຈາກຄວາມກ້າວໜ້າຂອງວິທະຍາສາດເຕັກໂນໂລຊີ. ປັດຈຸບັນ, 3 ຄວາມຂັດແຍ້ງໃຫຍ່ແລະພົ້ນເດັ່ນໃນຂົງເຂດເສດຖະກິດໂລກຍັງບໍ່ທັນໄດ້ຮັບການແກ້ໄຂໄດ້ດີເທື່ອແລະດ້ວຍເຫດນີ້,ພວກເຮົາຈິ່ງຕ້ອງຊຸກຍູ້ເສດຖະກິດໂລກາພິວັດຢ່າງເດັດດ່ຽວໜຽວແໜ້ນ, ນຳພາທິດທາງເສດຖະກິດໂລກາພິວັດ, ສ້າງຮູບແບບການເຕີບໂຕທີ່ມີຊີວິດຊີວາ,ຮູບແບບຮ່ວມມືທີ່ເປີດປະຕູແລະຕ່າງຝ່າຍຕ່າງມີຜົນປະໂຫຍດ, ຮູບແບບຄຸ້ມຄອງທີ່ຍຸຕິທຳແລະສົມເຫດສົມຜົນລວມທັງຮູບແບບພັດທະນາທີ່ກ້ຳເກິ່ງແລະສ້າງຜົນປະໂຫຍດໃຫ້ບັນດາຝ່າຍເພື່ອຮ່ວມກັນຊຸກຍູ້ການພັດທະນາຂອງໂລກ.
ທ່ານສີຈິ້ນຜິງຍັງຊີ້ໃຫ້ເຫັນຕື່ມວ່າ: ຫຼັງດຳເນີນການປະຕິຮູບແລະໄຂປະຕູສູ່ພາຍນອກເປັນເວລາ 38 ປີ, ຈີນໄດ້ກາຍເປັນກຸ່ມເສດຖະກິດໃຫຍ່ອັນດັບສອງຂອງໂລກແລະໄດ້ຮັບຜົນສຳເລັດຢ່າງໃຫຍ່ຫຼວງໃນດ້ານການພັດທະນາ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນຢ່າງຫຼວງຫຼາຍ ເຊິ່ງເປັນຜົນດີຕໍ່ຈີນກໍຄືທົ່ວໂລກ. ການພັດທະນາຂອງຈີນເປັນໂອກາດຂອງໂລກ, ຈີນເປັນຜູ້ໄດ້ຮັບຜົນປະໂຫຍດແລະຜູ້ປະກອບສ່ວນໃນເສດຖະກິດໂລກາພິວັດ.
ທ່ານສີຈິ້ນຜິງກ່າວຕື່ມວ່າ: ເດືອນພຶດສະພາປີນີ້, ຈີນຈະເປັນເຈົ້າພາບຈັດເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ຢູ່ນະຄອນຫຼວງປັກກິ່ງເພື່ອຊອກຫາວິທີແກ້ໄຂບັນຫາເສດຖະກິດໂລກກໍຄືພາກພື້ນທີ່ກຳລັງຜະເຊີນໃນປັດຈຸບັນ ແລະເພີ່ມພະລັງແຮງໃໝ່ເຂົ້າໃນການພັດທະນາເຊື່ອມໂຍງເຂົ້າກັນ ທັງເຮັດໃຫ້ການກໍ່ສ້າງ "ໜຶ່ງແລວທາງໜຶ່ງເສັ້ນທາງ"ສາມາດສ້າງຄວາມຜາສຸກໃຫ້ແກ່ປະຊາຊົນບັນດາປະເທດຫຼາຍກວ່າເກົ່າ.