ຂະບວນລົດໄຟຈີນ-ເອີຣົບ ເຊິ່ງເປັນຂະບວນລົດໄຟຈາກຈີນທີ່ເດີນທາງໄປອັງກິດຂະບວນທຳອິດ ໄດ້ເຖິງສະຖານີລົດໄຟນະຄອນຫຼວງລອນດອນດ້ວຍຄວາມສະດວກແລະປອດໄພໃນຕອນບ່າຍວັນທີ 18 ມັງກອນນີ້ ຫຼັງເດີນທາງອອກຈາກສະຖານີລົດໄຟຕາເວັນຕົກເມືອງຢີ້ອູ່ ສປ ຈີນໃນວັນທີ 1 ມັງກອນ ໂດຍແລ່ນໃນໄລຍະທາງ 12.451 ກິໂລແມັດ ແລະໃຊ້ເວລາ 18 ວັນຈຶ່ງເຖິງຈຸດໝາຍປາຍທາງ ເຊິ່ງເປັນການເປີດຊ່ອງທາງໃໝ່ໃນການຂົນສົ່ງສິນຄ້າລະຫວ່າງຈີນ-ອັງກິດ.
ທ່ານຈູ້ສິນ ອັກຄະລັດຖະທູດຈີນປະຈຳອັງກິດ ກ່າວວ່າ: ຂະບວນລົດໄຟຈີນ-ເອີຣົບທີ່ເດີນທາງເຖິງນະຄອນຫຼວງລອນດອນໄດ້ກາຍເປັນສັນຍະລັກໃຫ້ແກ່ໝາກຜົນໂຕຈິງແຫ່ງການຮ່ວມມືຫຼ້າສຸດຕາມຍຸດທະສາດ "ໜຶ່ງແລວທາງໜຶ່ງເສັ້ນທາງ" ລະຫວ່າງຈີນ-ອັງກິດ ແລະຈະເປັນພະລັງຊຸກຍູ້ໃໝ່ຕໍ່ການຮ່ວມມືດ້ານເສດຖະກິດການຄ້າລະຫວ່າງສອງປະເທດ.
ໃນຊຸມປີຜ່ານມາ, ການຮ່ວມມືດ້ານເສດຖະກິດການຄ້າລະຫວ່າງຈີນ-ອັງກິດໄດ້ຮັກສາທ່າອ່ຽງພັດທະນາຢ່າງໜັກແໜ້ນ ໂດຍມູນຄ່າການຄ້າລະຫວ່າງສອງຝ່າຍໄດ້ເພີ່ມຂຶ້ນຢ່າງວ່ອງໄວ. ທັງນີ້, ເຈົ້າໜ້າທີ່ດ່ານພາສີເມືອງຢີ້ອູ່ເປີດເຜີຍວ່າ: ນັບແຕ່ເດືອນມັງກອນຫາເດືອນພະຈິກປີຜ່ານມາ, ມູນຄ່າການນຳເຂົ້າແລະສົ່ງອອກຂອງເມືອງຕົນກັບອັງກິດບັນລຸເຖິງ 569 ລ້ານໂດລາສະຫະລັດ ເພີ່ມຂຶ້ນ 10% ເມື່ອທຽບໃສ່ໄລຍະດຽວກັນຂອງປີ 2015 ແລະອັງກິດໄດ້ກາຍເປັນປະເທດໃນເອີຣົບທີ່ເມືອງຕົນສົ່ງອອກສິນຄ້າຫຼາຍກວ່າໝູ່.
