ພິທີປິດກິດຈະກຳປີວັດທະນະທຳຈີນ-ເອຢິບ 2016 ໄດ້ຈັດຂຶ້ນຢູ່ເມືອງກວາງໂຈ່ວຂອງແຂວງກວາງຕຸ້ງຈີນໃນວັນທີ 19 ມັງກອນນີ້ ໂດຍທ່ານ ສີຈິ້ນຜິງ ປະທານປະເທດຈີນໄດ້ສົ່ງຈົດໝາຍເພື່ອສະແດງຄວາມຊົມເຊີຍຢ່າງຟົດຟື້ນຕໍ່ການຈັດກິດຈະກຳດັ່ງກ່າວຢ່າງສຳເລັດຜົນ. ທ່ານ ສີຈິ້ນຜິງ ຊີ້ໃຫ້ເຫັນວ່າ: ປີ 2016 ແມ່ນປີແຫ່ງການສ້າງສາຍພົວພັນທາງການທູດລະຫວ່າງຈີນ-ເອຢິບຄົບຮອບ 60 ປີ. ໃນ 60 ປີຜ່ານມາ,ພາຍໃຕ້ຄວາມພະຍາຍາມຂອງສອງຝ່າຍ, ການພົວພັນລະຫວ່າງຈີນ-ເອຢິບໄດ້ຂະຫຍາຍຕົວຢ່າງບໍ່ຢຸດຢັ້ງ ເຊິ່ງໄດ້ສ້າງຄວາມສົມບູນພູນສຸກໃຫ້ແກ່ສອງປະເທດກໍຄືປະຊາຊົນຂອງສອງປະເທດ,ກາຍເປັນແບບຢ່າງໃນການຂະຫຍາຍສາຍພົວພັນລະຫວ່າງຈີນ-ປະເທດອາຣັບ,ຈີນ-ປະເທດອາຟຣິກາກໍຄືສາຍພົວພັນລະຫວ່າງໃຕ້-ໃຕ້.
ທ່ານ ສີຈິ້ນຜິງ ເນັ້ນວ່າ: ກິດຈະກຳປີວັດທະນະທຳຈີນ-ເອຢິບແມ່ນປີວັດທະນະທຳທີ່ຈີນແລະປະເທດອາຣັບຈັດຂຶ້ນຄັ້ງທຳອິດ ເຊິ່ງເປັນມາດຕະການທີ່ສຳຄັນໃນການເພີ່ມທະວີຄວາມເຂົ້າໃຈກັນຂອງປະຊາຊົນພາຍໃຕ້ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ຂອງສອງປະເທດ, ກໍ່ເປັນກິດຈະກຳອັນມະໂຫລານເພື່ອແລກປ່ຽນແລະຖອດຖອນບົດຮຽນລະຫວ່າງວັດທະນະທຳເກົ່າແກ່ຂອງໂລກ. ຈີນຍິນດີຮ່ວມກັບຝ່າຍເອຢິບພະຍາຍາມສືບຕໍ່ເພີ່ມທະວີການແລກປ່ຽນດ້ານອະລິຍະທຳແລະການຮ່ວມມືດ້ານວັດທະນະທຳລະຫວ່າງສອງປະເທດ,ເພື່ອສ້າງພື້ນຖານປະຊາມະຕິແລະສັງຄົມໃຫ້ແກ່ການຂະຫຍາຍການພົວພັນທາງຍຸດທະສາດຮອບດ້ານລະຫວ່າງສອງປະເທດໃຫ້ມີຄວາມໜັກແໜ້ນ.