ສານທ້ອງຖິ່ນຟິລິບປິນແຫ່ງໜຶ່ງໄດ້ອອກໝາຍສັ່ງຈັບເຈົ້າໜ້າທີ່ຕຳຫຼວດຂັ້ນສູງສອງຄົນໃນວັນທີ 20 ມັງກອນນີ້ ຫຼັງຖືກສົງໄສລັກພາຕົວແລະລອບສັງຫານນັກທຸລະກິດ ສ.ເກົາຫຼີທີ່ດຳເນີນທຸລະກິດຢູ່ປະເທດຕົນ ໃນນາມປາບປາມຢາເສບຕິດເມື່ອເດືອນຕຸລາປີຜ່ານມາ ທັງຂົ່ມຂູ່ເອົາເງິນນຳຄອບຄົວຂອງຜູ້ເສຍຊີວິດຊາວ ສ.ເກົາຫຼີ ຄົນນັ້ນ.
ທັງນີ້ ສື່ມວນຊົນຟິລິບປິນ ລາຍງານວ່າ ຕຳຫຼວດສອງຄົນດັ່ງກ່າວໄດ້ສົມຮູ້ຮ່ວມຄິດກັບອີກ 5 ຄົນ ປອມແປງໃບສັ່ງກວດຄົ້ນ ໃນເດືອນຕຸລາປີ 2016 ຜ່ານມາ ແລະ ນຳເຈົ້າໜ້າທີ່ຂັ້ນສູງຂອງບໍລິສັດ ສ.ເກົາຫຼີ ທີ່ເຮັດວຽກຢູ່ຟິລິບປິນຜູ້ໜຶ່ງອອກຈາກເຮືອນໃນຂໍ້ອ້າງ "ສົງໄສຄ້າຂາຍຢາເສບຕິດ". ຈາກນັ້ນກໍຂົ່ມຂູ່ເອົາເງິນ 5 ລ້ານເປໂຊ ຫຼື ປະມານ 100.000 ໂດລາສະຫະລັດນຳພັນລະຍາຂອງເຂົາ ແລະຫຼັງພັນລະຍາຂອງຜູ້ຖືກລັກພາຕົວມອບຄ່າໄຖ່ແລ້ວແຕ່ບໍ່ເຫັນສາມີກັບຄືນ ທັງຍັງຖືກຮຽກເງິນອີກ 4 ລ້ານ 5 ແສນເປໂຊ ຈຶ່ງແຈ້ງຄວາມ.
ທ່ານໂຣນັນ ເດລາ ໂຣຊາ ຜູ້ບັນຊາການສຳນັກງານຕຳຫຼວດແຫ່ງຊາດຟິລິບປິນ ໄດ້ສະແດງຄວາມຂໍໂທດຕໍ່ລັດຖະບານ ສ.ເກົາຫຼີ ຜ່ານສື່ມວນຊົນ ໃນວັນທີ 20 ມັງກອນນີ້. ຂະນະທີ່ປັດຈຸບັນຍັງພິຈາລະນາຄະດີດັ່ງກ່າວຢູ່.
