ໜັງສືພິມ ຈາກາຕາພົສ ຂອງອິນໂດເນເຊຍສະບັບວັນທີ 22 ມັງກອນ 2017 ລາຍງານວ່າ, ຈີນໄດ້ລື່ນກາຍອິນໂດເນເຊຍໃນການເປັນແຫຼ່ງນັກທ່ອງທ່ຽວໃຫຍ່ອັນດັບໜຶ່ງຂອງສິງກະໂປ. ໂດຍນັບແຕ່ເດືອນມັງກອນຫາເດືອນພະຈິກປີຜ່ານມາ, ນັກທ່ອງທ່ຽວຈີນໄປທ່ຽວສິງກະໂປມີຫຼາຍກວ່າ 2 ລ້ານ 6 ແສນເທື່ອຄົນ, ທຽບໃສ່ໄລຍະດຽວກັນຂອງປີ 2015 ເພີ່ມຂຶ້ນ 36%. ຂະນະທີ່ 6 ເດືອນຕົ້ນຂອງປີຜ່ານມາ, ນັກທ່ອງທ່ຽວຈາກເມືອງລະດັບສອງຂອງຈີນໄປທ່ຽວສິງກະໂປເພີ່ມຂຶ້ນ 70%. ໄດ້ເຮັດໃຫ້ຍອດຈຳນວນນັກທ່ອງທ່ຽວສາກົນຂອງສິງກະໂປເພີ່ມຂຶ້ນ 7,9% ນັບແຕ່ເດືອນມັງກອນຫາເດືອນພະຈິກປີຜ່ານມາ.
ຂ່າວແຈ້ງວ່າ, ນັບແຕ່ເດືອນມັງກອນຫາເດືອນພະຈິກປີຜ່ານມາ, ນັກທ່ອງທ່ຽວອິນໂດເນເຊຍ 2 ລ້ານ 5 ແສນເທື່ອຄົນໄປທ່ຽວສິງກະໂປ, ແມ່ນແຫຼ່ງນັກທ່ອງທ່ຽວໃຫຍ່ອັນດັບສອງຂອງສິງກະໂປ, ແລະອັນດັບສາມແມ່ນມາເລເຊຍ.
 |
