ວັນທີ 23 ມັງກອນນີ້ ຢູ່ນະຄອນເຊີແນວ ປະເທດສະວິສ, ທ່ານນາງ ມາກາເຣັດ ຈັນຟຸງຟຸຊຸນ ຜູ້ອຳນວຍການໃຫຍ່ອົງການອະນາໄມໂລກ ຫຼື WHO ໄດ້ຮຽກຮ້ອງໃຫ້ປະເທດຕ່າງໆຈົ່ງຕິດຕາມແລະຄວບຄຸມພະຍາດໄຂ້ຫວັດສັດປີກ ທັງລາຍງານກໍລະນີຜູ້ເປັນພະຍາດດັ່ງກ່າວຢ່າງທັນການ ເພື່ອປ້ອງກັນບໍ່ໃຫ້ໄຂ້ຫວັດໃຫຍ່ແຜ່ລະບາດເປັນບໍລິເວນກວ້າງ. ທ່ານກ່າວວ່າ: ເຊື້ອໄວລັດໄຂ້ຫວັດສັດປີກສາຍພັນ H5N6 ທີ່ກຳລັງແຜ່ລະບາດຢູ່ອາຊີຢ່າງຮຸນແຮງນັ້ນ ເກີດຈາກການປະສົມລະຫວ່າງແຊນພະຍາດໄຂ້ຫວັດສັດປີກ 4 ສາຍພັນ.
ທ່ານນາງ ມາກາເຣັດ ກ່າວຕື່ມວ່າ: ຫຼັງໄຂ້ຫວັດໃຫຍ່ສາຍພັນ H1N1 ແຜ່ລະບາດຢ່າງຮຸນແຮງໃນທົ່ວໂລກເມື່ອປີ 2009-2010, ທົ່ວໂລກໄດ້ສຸມໃສ່ເຝົ້າລະວັງດີກວ່າເກົ່າເພື່ອຮັບມືກັບການແຜ່ລະບາດໄຂ້ຫວັດໃຫຍ່ອີກຄັ້ງໃໝ່, ແຕ່ກໍຍັງບໍ່ດີພໍ. ແນວໃດກໍດີ, ນັບແຕ່ເດືອນທັນວາປີ 2016 ເປັນຕົ້ນມາ, ຢູ່ຈີນໄດ້ລາຍງານມີຜູ້ຕິດເຊື້ອພະຍາດໄຂ້ຫວັດສັດປີກສາຍພັນ H7N9 ເພີ່ມຂຶ້ນຢ່າງວ່ອງໄວແລະກະທັນຫັນ ເຊິ່ງເປັນສິ່ງທີ່ຕ້ອງລະມັດລະວັງ.
ນອກນີ້, ທ່ານຍັງເນັ້ນວ່າ: ອີງຕາມຄວາມຮຽກຮ້ອງຕ້ອງການທີ່ລະບຸໄວ້ໃນກົດລະບຽບອະນາໄມສາກົນ, ຢູ່ປະເທດໃດຖ້າມີຄົນຕິດເຊື້ອພະຍາດໄຂ້ຫວັດສັດປີກແລ້ວກໍຕ້ອງລາຍງານທັນທີ ເພາະວ່າພວກເຮົາບໍ່ຄວນເຮັດໃຫ້ເກີດຄວາມຜິດພາດໃນການສົ່ງສັນຍານແຈ້ງເຕືອນໄພໃນໄລຍະຕົ້ນ.
