ຄະນະກຳມາທິການສະຫະພາບເອີຣົບປະກາດໃນວັນທີ 25 ມັງກອນນີ້ວ່າ ຈະໃຊ້ງົບປະມານ 200 ລ້ານເອີໂຣເພື່ອຊ່ວຍລີບີແລະປະເທດອາຟຣິກາເໜືອອື່ນໆເພີ່ມທະວີຄວບຄຸມຊາຍແດນຂອງປະເທດຕົນ ເຊິ່ງຖືເປັນມາດຕະການເພື່ອສະກັດກັ້ນບໍ່ໃຫ້ຊາວອົບພະຍົບລີບີຜ່ານທະເລເມດີແຕຣາເນເຂົ້າສູ່ເອີຣົບ.
ຫຼັງປະເທດມານຕາຂຶ້ນເປັນປະເທດປະທານໝູນວຽນຂອງສະຫະພາບເອີຣົບເມື່ອວັນທີ 1 ມັງກອນນີ້ ກໍໄດ້ກຳນົດເອົາບັນຫາຊາວອົບພະຍົບ ແລະ ຊາວຍ້າຍຖິ່ນຖານຜິດກົດໝາຍເປັນບັນຫາສຳຄັນໃນ 6 ເດືອນຕໍ່ໜ້າ ແລະວັນທີ 3 ກຸມພາໜ້ານີ້, ປະມຸກລັດຂອງບັນດາປະເທດສະມາຊິກສະຫະພາບເອີຣົບ ກໍຈະເຂົ້າຮ່ວມກອງປະຊຸມຢູ່ມານຕາ ເພື່ອປຶກສາຫາລືບັນຫາຊາວອົບພະຍົບແລະຊາວຍ້າຍຖິ່ນຖານຜິດກົດໝາຍ. ຂະນະທີ່ຄະນະກຳມາທິການສະຫະພາບເອີຣົບ ກໍໄດ້ໄຂກອງປະຊຸມກະກຽມເປັນພິເສດຫວ່າງມໍ່ໆນີ້ ເພື່ອປຶກສາຫາລືແຜນການແກ້ໄຂແລະມອບໃຫ້ປະມຸກລັດບັນດາປະເທດສະມາຊິກປຶກສາຫາລືກັນ.
ຄະນະກຳມາທິການສະຫະພາບເອີຣົບໄດ້ຕົກລົງເມື່ອທ້າຍປີຜ່ານມາວ່າ ຈະວາງແຜນສ້າງຕັ້ງ 11 ໂຄງການຊ່ວຍເຫຼືອຢູ່ເຂດ "ເຂົາອາຟຣິກາ" (Horn of Africa) ໂດຍຈະລົງທຶນປະມານ 170 ລ້ານເອີໂຣ ເພື່ອພັດທະນາເສດຖະກິດທ້ອງຖິ່ນ ແລະແກ້ໄຂກົກເຄົ້າຂອງວິກິດການຊາວອົບພະຍົບທີ່ເອີຣົບພວມຜະເຊີນ.