ທ່ານໂດນັນ ທຣຳ ປະທານາທິບໍດີອາເມລິກາກ່າວຫຼັງລົງນາມໃນລັດຖະດຳລັດສອງສະບັບຢູ່ກະຊວງຮັກສາຄວາມໝັ້ນຄົງດິນແດນຂອງອາເມລິກາໃນວັນທີ 25 ມັງກອນນີ້ ເພື່ອເພີ່ມທະວີຄວາມໝັ້ນຄົງເຂດຊາຍແດນ ແລະ ຄວາມເຂັ້ມງວດຕໍ່ນະໂຍບາຍຊາວອົບພະຍົບວ່າ ຈະໃຊ້ງົບປະມານຂອງປະເທດສ້າງກຳແພງຊາຍແດນອາເມລິກາ-ແມັກຊິກໃນບໍ່ເທົ່າໃດເດືອນຂ້າງໜ້ານີ້.
ທັງນີ້ ທ່ານເຊນ ສະປີເຊີ ໂຄສົກທຳນຽບຂາວອາເມລິກາໄດ້ກ່າວໃນພິທີຖະແຫຼງຂ່າວທີ່ຈັດຂຶ້ນໃນມື້ດຽວກັນວ່າ: ການສ້າງກຳແພງທີ່ເປັນອຸປະສັກຂະໜາດໃຫຍ່ນີ້ມີຄວາມໝາຍໃຫຍ່ກວ່າການໃຫ້ຄຳໝັ້ນສັນຍາໃນການຫາສຽງເລືອກຕັ້ງປະທານາທິບໍດີ ເພາະມັນຈະສາມາດສະກັດກັ້ນບໍ່ໃຫ້ຢາເສບຕິດ, ການກໍ່ອາຊະຍາກຳ ແລະ ຊາວອົບພະຍົບຜິດກົດໝາຍ ເຂົ້າສູ່ປະເທດຕົນ.
ການສ້າງກຳແພງຊາຍແດນອາເມລິກາ-ແມັກຊິກ ແມ່ນໜຶ່ງໃນຄຳໝັ້ນສັນຍາທີ່ທ່ານໂດນັນ ທຣຳ ກ່າວໃນໄລຍະຫາສຽງເລືອກຕັ້ງປະທານາທິບໍດີ. ຂະນະທີ່ປັດຈຸບັນ ຢູ່ຊາຍແດນອາເມລິກາ-ແມັກຊິກ ໄດ້ສ້າງຮົ້ວທີ່ຍາວ 1.050 ກິໂລແມັດແລ້ວ.