ວັນທີ 29 ມັງກອນນີ້ຕາມເວລາທ້ອງຖິ່ນ, ງານສະຫຼອງບຸນກຸດຈີນທີ່ສະໜາມຫຼວງທຣາຟານກາແຫ່ງລອນດອນປະຈຳປີໄດ້ເປີດສາກຂຶ້ນ, ນີ້ແມ່ນງານສະຫຼອງບຸນກຸດຈີນທີ່ໃຫຍ່ສຸດໃນໂລກນອກຈາກອາຊີ ໂດຍທ່ານລິວສຽວໝິງ ເອກອັກຄະລັດຖະທູດຈີນປະຈຳອັງກິດ, ທ່ານນາງວັງສຽວຜີງ ຮອງຫົວໜ້າຫ້ອງການວຽກງານຊາວຈີນຕ່າງດ້າວຂອງລັດຖະບານຈີນເຂົ້າຮ່ວມ. ທ່ານລິວສຽວໝິງໄດ້ກ່າວປາໄສວ່າ, ກິດຈະກຳສະຫຼອງບຸນກຸດຈີນແມ່ນເປັນທີ່ເອກອ້າງຂອງຕົວເມືອງລອນດອນ, ເຊິ່ງໄດ້ກາຍເປັນໜຶ່ງໃນບັນດາງານສະຫຼອງວັນບຸນທີ່ສຳຄັນທີ່ສຸດຂອງຕົວເມືອງທີ່ຍິ່ງໃຫຍ່ແຫ່ງນີ້, ແລະກາຍເປັນພາກສ່ວນໜຶ່ງທີ່ຂາດບໍ່ໄດ້ຂອງລອນດອນໃນທຸກປີ.
ມື້ດຽວກັນ ພະລາຊີນີເອລິຊາເບັສ II ເຈົ້າຊີວິດອັງກິດໄດ້ສົ່ງຈົດໝາຍອວຍພອນໄປເຖິງພິທີເປີດງານດັ່ງກ່າວ, ເພື່ອສະແດງຄວາມຢື້ຢາມຖາມຂ່າວໃນຍາມບຸນຕໍ່ຜູ້ທີ່ເຂົ້າຮ່ວມງານໝົດທຸກຄົນ. ແລະໃນງານດັ່ງກ່າວຍັງໄດ້ອ່ານຄຳອວຍພອນບຸນກຸດຈີນຂອງທ່ານນາງເທເລຊາ ເມ ນາຍົກລັດຖະມົນຕີອັງກິດອີກດ້ວຍ.
ງານສະຫຼອງບຸນກຸດຈີນທີ່ສະໜາມຫຼວງທຣາຟານກາແມ່ນຈັດຂຶ້ນໂດຍສະມາຄົມຊາວຈີນລອນດອນ. ປີນີ້, ນອກຈາກມີການສະແດງຕ່າງໆຢູ່ສະໜາມຫຼວງດັ່ງກ່າວແລ້ວ, ສະມາຄົມຊາວຈີນລອນດອນຍັງຮ່ວມມືກັບຫຼາຍອົງການ, ເພື່ອດຳເນີນກິດຈະກຳສະຫຼອງບຸນກຸດຈີນຕ່າງໆຢູ່ຫໍສິລະປະ, ເດີລອນດອນໄອ້ສ ແລະແຫ່ງອື່ນໆຂອງອັງກິດອີກດ້ວຍ.