ສື່ມວນຊົນອັຟການິສຖານລາຍງານໃນວັນທີ 5 ກຸມພານີ້ວ່າ, ຢູ່ແຂວງນູຣິສຖານ ທາງພາກຕາເວັນອອກປະເທດຕົນ ໄດ້ເກີດຫິມະເຈື່ອນ ສົ່ງຜົນເຮັດໃຫ້ 50 ຄົນເສຍຊີວິດເປັນຢ່າງໜ້ອຍ ແລະ 10 ກວ່າຄົນໄດ້ຮັບບາດເຈັບ.
ຜູ້ສັນທັດກໍລະນີຢູ່ແຂວງດັ່ງກ່າວຢືນຢັນວ່າ: ຢູ່ບໍລິເວນໃກ້ບ້ານແຫ່ງໜຶ່ງ ເຂດບາກ-ເອ-ມາຖານ ແຂວງດັ່ງກ່າວໄດ້ເກີດຫິມະເຈື່ອນໃນຕອນທ່ຽງວັນທີ 5 ກຸມພານີ້ ສົ່ງຜົນເຮັດໃຫ້ມີຫຼາຍຄົນເສຍຊີວິດ ຫຼື ບາດເຈັບ ທັງເຮັດໃຫ້ເສັ້ນທາງໄປສູ່ບ້ານດັ່ງກ່າວຫຼາຍເສັ້ນຖືກຕັດຂາດ. ປັດຈຸບັນ ທ້ອງຖິ່ນດັ່ງກ່າວພວມສົ່ງພະນັກງານກູ້ໄພໄປຊ່ວຍເຫຼືອຜູ້ປະສົບໄພ.
ຂ່າວແຈ້ງອີກວ່າ, 3 ມື້ຜ່ານມາ, ທົ່ວປະເທດອັຟການິສຖານໄດ້ມີຫິມະຕົກໜັກ ແລະໜາວທີ່ສຸດ ສົ່ງຜົນເຮັດໃຫ້ມີຜູ້ເສຍຊີວິດເພີ່ມຂຶ້ນເປັນ 90 ກວ່າຄົນ. ຂະນະທີ່ໄພຫິມະຕົກໜັກ ແລະ ຫິມະເຈື່ອນ ຍັງເຮັດໃຫ້ເຮືອນ 200 ກວ່າຫຼັງຖືກທຳລາຍ.
