ສື່ມວນຊົນຫວຽດນາມລາຍງານວ່າ: ທ່ານເຈິນຕວນແອງ ລັດຖະມົນຕີກະຊວງອຸດສາຫະກຳການຄ້າຫວຽດນາມຢືນຢັນເມື່ອມໍ່ໆນີ້ວ່າ: ກະຊວງຕົນມີແຜນຈະສ້າງຕັ້ງກົມສົງເຄາະການຄ້າເພື່ອຮັບປະກັນສິດແລະຜົນປະໂຫຍດທີ່ຊອບດ້ວຍກົດໝາຍຂອງວິສາຫະກິດຫວຽດນາມພາຍໃຕ້ສະພາບໂລກາພິວັດ.
ທ່ານເຈິນຕວນແອງກ່າວວ່າ: ກົມສົງເຄາະການຄ້າກະຊວງອຸດສາຫະກຳການຄ້າຈະຊ່ວຍປະຕິບັດໜ້າທີ່ການບໍລິຫານຂອງລັດໃນການສົງເຄາະການຄ້າໂດຍປະສານງານກັບຂະໜງການອື່ນ ປະຕິບັດ ກົດໝາຍຂອງຫວຽດນາມວ່າດ້ວຍການຕ້ານການຂາຍເທຕະຫຼາດແລະຕ້ານການອຸດໜູນພ້ອມດ້ວຍມາດຕະການສົງເຄາະການຄ້າອື່ນໆທີ່ເໝາະຕໍ່ສິນຄ້ານຳເຂົ້າ ຫວຽດນາມ.
ທ່ານເຈິນຕວນແອງຢືນຢັນວ່າ ກະຊວງຕົນກຳລັງຮ່າງກົດໝາຍການຄ້າຕ່າງປະເທດເພື່ອປະຕິບັດຍຸດທະສາດເຊື່ອມໂຍງສາກົນຂອງປະເທດຕົນ ຂະນະທີ່ກົດໝາຍການຄ້າຕ່າງປະເທດຈະຈັດໝວດສະເພາະກຳນົດມາດຕະການສົງເຄາະການຄ້າເຊັ່ນການຕ້ານການຂາຍເທຕະຫຼາດ,ຕ້ານການອຸດໜູນແລະອື່ນໆ ແລະຮ່າງກົດໝາຍສະບັບດັ່ງກ່າວຈະສະເໜີຕໍ່ກອງປະຊຸມສະພາແຫ່ງຊາດຄັ້ງໜ້າເພື່ອ ພິຈາລະນາແລະຮັບຮອງ.
 |
