ກອງປະຊຸມພົບປະຫາລືລະຫວ່າງການນຳກະຊວງການຕ່າງປະເທດແລະກະຊວງປ້ອງກັນປະເທດລະດັບສູງຂອງຈີນ-ມຽນມາໄດ້ຈັດຂຶ້ນຢູ່ເມືອງຄຸນມິງ ແຂວງຢຸນນານ ສປ ຈີນ ໃນວັນທີ 7 ກຸມພານີ້ ໂດຍສອງຝ່າຍເຫັນວ່າ ສາຍພົວພັນລະຫວ່າງສອງປະເທດໄດ້ຮັບການພັດທະນາເປັນຢ່າງດີ, ຂະນະດຽວກັນກໍໄດ້ເປັນເອກະສັນກັນວ່າ, ການແກ້ໄຂບັນຫາພາກເໜືອມຽນມາໃຫ້ເໝາະສົມ, ຮັກສາເຂດຊາຍແດນຈີນ-ມຽນມາໃຫ້ມີສັນຕິພາບແລະສະຖຽນລະພາບນັ້ນ ມີຄວາມໝາຍສຳຄັນຕໍ່ການຊຸກຍູ້ການຮ່ວມມືຍຸດທະສາດຮອບດ້ານລະຫວ່າງສອງປະເທດໃນສະໄໝໃໝ່.
ຈີນຫວັງວ່າບັນດາຝ່າຍທີ່ກ່ຽວຂ້ອງຂອງມຽນມາຈະຮັກສາຄວາມອົດກັ້ນຢ່າງແທ້ຈິງ ແລະບັນລຸການຢຸດຍິງຢູ່ພາກເໜືອໂດຍໄວ ເພື່ອຫຼີກເວັ້ນບໍ່ໃຫ້ກະທົບຕໍ່ສະຖຽນລະພາບຢູ່ເຂດຊາຍແດນລະຫວ່າງສອງປະເທດ. ຂະນະທີ່ມຽນມາກໍໄດ້ແຈ້ງໃຫ້ຊາບຄວາມຄືບໜ້າໃໝ່ແຫ່ງຂະບວນການສັນຕິພາບໃນປະເທດຕົນ ທັງໄດ້ນຳສະເໜີສະພາບການກະກຽມກອງປະຊຸມສັນຕິພາບປາງລອງສະຕະວັດທີ 21 ຄັ້ງທີສອງ. ຂະນະດຽວກັນ, ມຽນມາກໍໄດ້ຢືນຢັນວ່າ ຈະໃຊ້ມາດຕະການຈິງຈັງເຮັດໃຫ້ສະຖານະການພາກເໜືອປະເທດຕົນມີຄວາມສະຫງົບ ທັງຈະສືບຕໍ່ຊຸກຍູ້ຂະບວນການສັນຕິພາບພາຍໃນປະເທດໃຫ້ມີຄວາມຄືບໜ້າຢ່າງໜັກແໜ້ນ. ແນວໃດກໍດີ, ມຽນມາໄດ້ສະແດງຄວາມຂອບໃຈຈີນທີ່ໄດ້ໃຫ້ການຊ່ວຍເຫຼືອຢ່າງຕັ້ງໜ້າຕໍ່ຂະບວນການດັ່ງກ່າວ ແລະຊົມເຊີຍຕໍ່ການສືບຕໍ່ເສີມຂະຫຍາຍບົດບາດທີ່ສ້າງສັນໃນຂະບວນການດັ່ງກ່າວ.
ນອກນີ້, ສອງປະເທດໄດ້ຫາລືແລະຕົກລົງກັນວ່າ ຈະຈັດກອງປະຊຸມພົບປະຫາລືອີກຄັ້ງໃໝ່ຢູ່ຈີນພາຍໃນປີນີ້ ໂດຍສະເພາະຈະປະສານງານເລື່ອງເວລາແລະສະຖານທີ່ຈັດກອງປະຊຸມ.
