ກະຊວງການຄ້າສາກົນແລະອຸດສາຫະກຳມາເລເຊຍເຜີຍແຜ່ຂໍ້ມູນການຄ້າປີ 2016 ໃນວັນທີ 8 ກຸມພານີ້ວ່າ: ມູນຄ່າການຄ້າລະຫວ່າງມາເລເຊຍ-ຈີນໃນປີ2016 ຜ່ານມາບັນລຸເຖິງ240 ຕື້ 900 ລ້ານຣິງກິດຫຼືປະມານ 54 ຕື້ 300 ລ້ານໂດລາສະຫະລັດ ເພີ່ມຂຶ້ນ 4,4% ເມື່ອທຽບໃສ່ປີ 2015, ຈາກນີ້, ຈີນຈິ່ງກາຍເປັນຄູ່ການຄ້າໃຫຍ່ທີ່ສຸດຂອງມາເລເຊຍເປັນເວລາ 8 ປີຕິດຕໍ່ກັນນັບແຕ່ປີ 2009 ເປັນຕົ້ນມາ.
ຂໍ້ມູນດັ່ງກ່າວຊີ້ໃຫ້ເຫັນວ່າ: ປີ 2016 ຜ່ານມາ, ສິນຄ້າທີ່ມາເລເຊຍສົ່ງອອກໄປຈີນຕົ້ນຕໍມີແກັສທຳມະຊາດແຫຼວ,ຢາງພາລາທຳມະຊາດແລະອື່ນໆ, ຂະນະທີ່ໄດ້ນຳເຂົ້າສິນຄ້າຈາກຈີນຕົ້ນຕໍມີຜະລິດຕະພັນນ້ຳມັນເຊື້ອໄຟ,ຜະລິດຕະພັນເອເລັກໂຕຣນິກແລະເຄື່ອງໃຊ້ໄຟຟ້າພ້ອມດ້ວຍອຸປະກອນກົນຈັກໄຟຟ້າ,ອາໄຫຼ່ຊິ້ນສ່ວນ ແລະອື່ນໆ.
ທ່ານຫວງຮຸ້ຍຄ່າງ ເອກອັກຄະລັດຖະທູດຈີນປະຈຳມາເລເຊຍຢືນຢັນຕໍ່ສື່ມວນຊົນກ່ອນໜ້ານີ້ວ່າ: ເຖິງວ່າປີ 2016, ຫວຽດນາມເຊິ່ງເປັນໜຶ່ງໃນບັນດາປະເທດສະມາຊິກອາຊຽນໄດ້ກັບຂຶ້ນເປັນຄູ່ການຄ້າໃຫຍ່ທີ່ສຸດຂອງຈີນແທນທີ່ມາເລເຊຍກໍຕາມ,ແຕ່ມາເລເຊຍຍັງຄົງເປັນແຫຼ່ງສິນຄ້ານຳເຂົ້າໃຫຍ່ອັນດັບໜຶ່ງຂອງຈີນໃນພາກພື້ນນີ້.
 |
