ກະຊວງການຄ້າຈີນປະກາດໃນວັນທີ 9 ກຸມພານີ້ວ່າ: ປີ 2016 ຜ່ານມາ, ມູນຄ່າການຄ້າຂາຍຍ່ອຍທາງອິນເຕີເນັດຂອງຈີນໄດ້ບັນລຸ 5.160 ຕື້ຢວນ ເພີ່ມຂຶ້ນ 26,2% ເມື່ອທຽບໃສ່ປີ 2015 ແລະເພີ່ມຂຶ້ນໄວກວ່າຈັງຫວະເຕີບໂຕຂອງມູນຄ່າຂາຍຍ່ອຍເຄື່ອງບໍລິໂພກສັງຄົມຈີນກວ່າ 2 ເທົ່າ.
ທັງນີ້, ທ່ານຊຸ່ນຈີ້ເຫວີນ ໂຄສົກກະຊວງການຄ້າຈີນ ໄດ້ຢືນຢັນໃນພິທີຖະແຫຼງຂ່າວທີ່ຈັດຂຶ້ນຢູ່ນະຄອນຫຼວງປັກກິ່ງໃນວັນດັ່ງກ່າວວ່າ: ການຄ້າຂາຍຍ່ອຍທາງອິນເຕີເນັດໄດ້ກາຍເປັນພະລັງແຮງທີ່ສຳຄັນໃນການຊຸກຍູ້ຂະແໜງການຂາຍຍ່ອຍຂອງຈີນໃຫ້ເຕີບໂຕ. ອີງຕາມຜົນການຕິດຕາມວິສາຫະກິດຂາຍຍ່ອຍຂອງທາງການ, ຈັງຫວະເຕີບໂຕຂອງຂະແໜງການຂາຍຍ່ອຍທາງອິນເຕີເນັດບັນລຸເຖິງ 25,4% ສູງກວ່າຈັງຫວະເຕີບໂຕຂອງຂະແໜງການຂາຍຍ່ອຍອື່ນໆ ເຊັ່ນ ຮ້ານສັບພະສິນຄ້າ ແລະ ຊຸບເປີມາແກັດ.
