ກົມດ່ານພາສີຈີນເປີດເຜີຍວ່າ ເດືອນມັງກອນ 2017 ນີ້, ຈີນບັນລຸມູນຄ່າການນຳເຂົ້າແລະສົ່ງອອກສິນຄ້າເຖິງ 2180 ຕື້ຢວນ ຫຼື 316 ຕື້ໂດລາສະຫະລັດ ເພີ່ມຂຶ້ນ 19,6% ເມື່ອທຽບໃສ່ໄລຍະດຽວກັນຂອງປີຜ່ານມາ ເຊິ່ງລື່ນຄາດໝາຍຢ່າງຫຼວງຫຼາຍ. ຂະນະທີ່ໄລ່ຕາມສະກຸນເງິນໂດລາສະຫະລັດ, ການສົ່ງອອກຂອງຈີນໃນເດືອນມັງກອນໄດ້ເພີ່ມຂຶ້ນ 7,9% ເມື່ອທຽບໃສ່ໄລຍະດຽວກັນຂອງປີຜ່ານມາ ຫຼັງຫຼຸດລົງມາເປັນເວລາ 9 ເດືອນຕິດຕໍ່ກັນ. ຈາກນີ້,ນັກວິເຄາະເຫັນວ່າ ນີ້ເປັນສັນຍານສະແດງໃຫ້ເຫັນວ່າ ໂດຍລວມແລ້ວ,ການຄ້າກັບຕ່າງປະເທດຂອງຈີນປີນີ້ຈະດີກວ່າປີຜ່ານມາ ແຕ່ກໍຕ້ອງເອົາໃຈໃສ່ປັດໄຈທີ່ບໍ່ແນ່ນອນ.
ເຈົ້າໜ້າທີ່ສະຖາບັນຄົ້ນຄວ້າກະຊວງການຄ້າຈີນຢືນຢັນວ່າ ການສົ່ງອອກແລະນຳເຂົ້າໃນເດືອນມັງກອນຜ່ານມາລ້ວນແຕ່ຂະຫຍາຍຕົວສູງກວ່າ 10% ເຊິ່ງເປັນຜົນມາຈາກຕະຫຼາດສາກົນພັດທະນາດີຂຶ້ນແລະຄວາມຕ້ອງການກໍເພີ່ມຂຶ້ນ.
ດ່ານພາສີເປີດເຜີຍອີກວ່າ ຕາມການຄາດຄະເນໃນເບື້ອງຕົ້ນຄືໃນໄຕມາດທີສອງປີ 2017 ນີ້, ແຮງກົດດັນດ້ານການສົ່ງອອກຂອງຈີນຈະຫຼຸດອ່ອນລົງ.
