ໃນການຖະແຫຼງຂ່າວປົກກະຕິຂອງກະຊວງການຕ່າງປະເທດຈີນທີ່ຈັດຂຶ້ນໃນວັນທີ 13 ກຸມພານີ້, ມີນັກຂ່າວຖາມວ່າ: ຜູ້ນຳຍີ່ປຸ່ນ-ອາເມລິກາໄດ້ອອກຖະແຫຼງການຮ່ວມເມື່ອມໍ່ໆນີ້ໂດຍເນັ້ນໃນມາດຕາທີ 5 ຂອງສົນທິສັນຍາຮັກສາຄວາມໝັ້ນຄົງອາເມລິກາ-ຍີ່ປຸ່ນເປັນສິ່ງສົມຄວນໃນການນຳໃຊ້ກັບເກາະຕ້ຽວຢູ ແລະສອງຝ່າຍຮຽກຮ້ອງໃຫ້ຫຼີກເວັ້ນການເຮັດໃຫ້ເກາະແລະຫີນໂສໂຄກນຳໄປສູ່ການໃຊ້ກຳລັງການທະຫານແລະມາດຕະການອື່ນໆເພື່ອເຮັດໃຫ້ສະຖານະການຢູ່ທະເລຈີນໃຕ້ເຄັ່ງຕຶງຂຶ້ນ.ຈາກນີ້,ຝ່າຍຈີນມີຄວາມເຫັນແນວໃດ?
ທ່ານເກິງສວາງ ໂຄສົກກະຊວງການຕ່າງປະເທດຈີນຢືນຢັນວ່າ ເກາະຕ້ຽວຢູພ້ອມດ້ວຍເກາະຕ່າງໆທີ່ຢູ່ບໍລິເວນອ້ອມຂ້າງເປັນດິນແດນຂອງຈີນມາແຕ່ບູຮານນະການ. ຈາກນີ້,ຈີນຈິ່ງເດັດດ່ຽວຄັດຄ້ານທີ່ຍີ່ປຸ່ນອ້າງວ່າ "ສົນທິສັນຍາຮັກສາຄວາມໝັ້ນຄົງອາເມລິກາ-ຍີ່ປຸ່ນ" ແກ່ດຶງ ອາເມລິກາເຂົ້າມາເຜີຍແຜ່ຈຸດຢືນຕໍ່ຜືນແຜ່ນດິນທີ່ບໍ່ຖືກຕ້ອງຕາມກົດໝາຍຂອງຕົນ. ຍີ່ປຸ່ນແລະອາເມລິກາຄວນລະວັງວາຈາແລະການກະທຳຂອງຕົນ ທັງຢຸດການອອກຖະແຫຼງການທີ່ຜິດພາດ ເພື່ອຫຼີກເວັ້ນບໍ່ໃຫ້ບັນຫາທີ່ກ່ຽວຂ້ອງສັບສົນຂຶ້ນ ແລະສົ່ງຜົນສະທ້ອນທາງລົບສູ່ສັນຕິພາບແລະສະເຖຍລະພາບຂອງພາກພື້ນ.
ກ່ຽວກັບບັນຫາທະເລຈີນໃຕ້, ທ່ານເກິງສວາງເນັ້ນວ່າ: ຈີນເດັດດ່ຽວ ຮ່ວມກັບປະເທດກ່ຽວຂ້ອງໂດຍກົງແກ້ໄຂຂໍ້ຂັດແຍ້ງດ້ວຍສັນຕິວິທີ ແລະຮ່ວມກັບບັນດາປະເທດສະມາຊິກອາຊຽນປົກປັກຮັກສາສັນຕິພາບແລະສະເຖຍລະພາບຂອງເຂດທະເລຈີນໃຕ້. ຂະນະທີ່ໄດ້ມີບາງປະເທດສົ່ງເຮືອບິນແລະກຳປັ່ນຮົບໄປ ທະເລຈີນໃຕ້ເພື່ອສະແດງກຳລັງການສູ້ຮົບ ຫຼືຍຸແຍ່ການພົວພັນລະຫວ່າງຈີນກັບປະເທດກ່ຽວຂ້ອງ ເຊິ່ງນີ້ຄືປັດໄຈສຳຄັນທີ່ຈະຊຸກຍູ້ບັນຫາທະເລຈີນໃຕ້ນຳໄປສູ່ການໃຊ້ກຳລັງການທະຫານ.
 |
