ຕາມຂ່າວສານຈີນ: ກ່ອນໜ້ານີ້ບໍ່ດົນ ໄດ້ກະກຽມຖ່າຍທຳຮູບເງົາເລື່ອງ "ຜູ້ເສຍໄຊເປັນເຈົ້າ" ເຊິ່ງເປັນເລື່ອງທີ່ບັນທຶກຊີວະປະຫວັດຂອງ ລີຈົງເວີຍ ນັກກິລາດອກປີກໄກ່ຜູ້ມີຊື່ສຽງຂອງມາເລເຊຍ ເຊິ່ງຮູບເງົາເລື່ອງນີ້ກຳກັບການສະແດງໂດຍທ່ານ ແທງບີ ຜູ້ກຳກັບການສະແດງໜຸ່ມຂອງມາເລເຊຍ.
ສຳລັບປະຫວັດການແຂ່ງຂັນຜ່ານມາ, ລີຈົງເວີຍ ໄດ້ພົບກັບນັກກິລາດີເດັ່ນລະດັບໂລກບໍ່ໜ້ອຍ ໂດຍສະເພາະໄດ້ແຂ່ງຂັນກັບ ລິນຕ່ານ ນັກກິລາຈີນ ທີ່ສາມາດດຶງດູດຄວາມສົນໃຈຂອງໂລກ. ເມື່ອຖາມວ່າຈະໃຫ້ນັກກິລາຜູ້ດີເດັ່ນເຫຼົ່ານີ້ມາສະແດງຫຼືບໍ່ນັ້ນ, ທ່ານ ແທງບີ ກ່າວວ່າ, ທັງນີ້ ຕ້ອງເບິ່ງການກຳນົດເນື້ອເລື່ອງຮູບເງົາໃນຂັ້ນສຸດທ້າຍ ແລະຫວັງວ່າ ຈະສາມາດສ່ອງແສງໃຫ້ເຫັນເຖິງຊີວິດການເປັນຢູ່ແລະຊີວະປະຫວັດກໍຄືຄວາມບາກບັ່ນສູ້ຊົນທີ່ແທ້ຈິງຂອງ ລີຈົງເວີຍ. ແນວໃດກໍດີ, ຖ້າຈຳເປັນ ກໍຈະເຊີນນັກກິລາລະດັບໂລກເຫຼົ່ານີ້ເຂົ້າຮ່ວມສະແດງນຳ.