ທະນາຄານກາງເນປານໄດ້ຮັບທະນາບັດໃບໜຶ່ງພັນຣູປີງວດທຳອິດ 24 ລ້ານໃບຈາກບໍລິສັດຜະລິດທະນາບັດແລະເງິນຫຼຽນຈີນເມື່ອບໍ່ດົນນີ້, ຂະນະທີ່ທ່ານພຸບັນ ກາເດວ ຜູ້ວ່າການບໍລິຫານງານທະນາຄານກາງເນປານ ກ່າວວ່າ: ທະນາບັດທີ່ບໍລິສັດຈີນພິມທັງງາມທັງລາຄາຖືກ ທັງສາມາດປະຢັດຕົ້ນທຶນການພິມໄດ້ເກືອບ 50%.
ເດືອນທັນວາປີຜ່ານມາ, ວິສາຫະກິດຈີນໄດ້ເຊັນສັນຍາກັບເນປານເພື່ອພິມທະນາບັດໃບໜຶ່ງພັນຣູປີໃຫ້ແກ່ປະເທດດັ່ງກ່າວ. ຂະນະທີ່ປັດຈຸບັນ, ທະນາບັດງວດທຳອິດ 84 ລ້ານໃບ ກຳລັງຂົນສົ່ງໃຫ້ເນປານ ແລະ ເນປານກໍໄດ້ຮັບ 24 ລ້ານໃບກ່ອນແລ້ວ.
ຂ່າວແຈ້ງວ່າ, ກ່ອນໜ້ານີ້, ເນປານໄດ້ມອບໃຫ້ບໍລິສັດອິນໂດເນເຊຍ, ຝຣັ່ງ ແລະ ອົສຕຣາລີພິມທະນາບັດມາໂດຍຕະຫຼອດ ແລະ ເມື່ອເດືອນມິຖຸນາປີຜ່ານມາ, ຫຼັງຈີນແລະເນປານໄດ້ຮ່ວມມືເປັນຄັ້ງທຳອິດ ກໍໄດ້ມອບໃຫ້ວິສາຫະກິດຈີນຊ່ວຍພິມເງິນຣູປີດັ່ງກ່າວ.