ໃນວັນທີ 14 ກຸມພາ 2017 ທີ່ນະຄອນຫລວງວຽງຈັນ, ທ່ານນາງອາຣີນາ ຢູ່ຊ໋ອບ ຄານ, ປະທານໜ່ວຍງານຮ່ວມມືດ້ານຊັບສິນທາງປັນຍາໄດ້ເປັນປະທານກອງປະຊຸມໜ່ວຍງານຮ່ວມມືທາງດ້ານຊັບສິນທາງປັນຍາອາຊຽນ (AWGIPC) ຄັ້ງທີ 52, ໂດຍມີຜູ້ແທນຈາກ 10 ປະເທດອາຊຽນ ແລະ ຍີ່ປຸ່ນ ເຂົ້າຮ່ວມ.
ທ່ານ ຫຸມພັນ ອິນທະຣາດ, ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ກ່າວໃນກອງປະຊຸມດັ່ງກ່າວວ່າ: ອາຊຽນຈະບັນລຸເປົ້າໝາຍກາຍເປັນສູນກາງທາງຊັບສິນທາງປັນຍາ, ໂດຍຜ່ານການປະຕິບັດ 19 ໂຄງການໃນແຜນປະຕິບັດງານ 2016-2025 ໂດຍໃນ 10ປີຕໍ່ໜ້າ. ແຜນປະຕິບັດງານດັ່ງກ່າວນີ້, ຈະເຮັດໃຫ້ການຈົດທະບຽນຊັບສິນທາງປັນຍາ, ໂດຍສະເພາະເຄື່ອງໝາຍການຄ້າໃນອາຊຽນຈະກົມກຽວກັນ, ພ້ອມທັງຈະປັບປຸງຂັ້ນຕອນການຈົດທະບຽນໃຫ້ງ່າຍຂຶ້ນ ແລະ ສ້າງກົນໄກການສົ່ງເສີມການອໍານວຍຄວາມສະດວກ ໃນການດຳເນີນທຸລະກິດ ແລະ ປັບປຸງວຽກງານການບັງຄັບໃຊ້ສິດທາງດ້ານຊັບສິນທາງປັນຍາ.
ກອງປະຊຸມດັ່ງກ່າວ, ຈະໄດ້ຮ່ວມຫາລືກັນເພື່ອຮັບປະກັນໃຫ້ແກ່ການຈັດຕັ້ງປະຕິບັດ ບັນດາໂຄງການໃໝ່, ເປັນຕົ້ນການສ້າງຕັ້ງ ເຄື່ອຂ່າຍຊັບສິນທາງປັນຍາອາຊຽນ, ການສ້າງສູນບໍລິການໃຫ້ຄຳປຶກສາທາງອອນລາຍ, ສົ່ງເສີມກົນໄກການປົກປ້ອງແຫລ່ງພັນທຸກຳ, ພູມປັນຍາທ້ອງຖິ່ນ, ການສະແດງອອກທາງດ້ານວັດທະນະທຳດັ້ງເດີມ, ການປັບປຸງການບໍລິການ ການປົກປ້ອງເຄື່ອງໝາຍການຄ້າ, ສືບຕໍ່ອຳນວຍຄວາມສະດວກ ໃຫ້ບັນດາຊ່ຽວຊານທາງດ້ານຊັບສິນທາງປັນຍາ ແລກປ່ຽນບົດຮຽນ, ວິທີການຮັບມືກັບ ສິ່ງທ້າທາຍຕ່າງໆ ອາຊຽນ ກຳລັງປະເຊີນ ແລະ ຮ່ວມມືກັນ ເພື່ອສ້າງຄວາມກົມກຽວກັນໃນພາກພື້ນ.