ກອງປະຊຸມລັດຖະມົນຕີກະຊວງການຕ່າງປະເທດຂອງກຸ່ມ 20 ປະເທດ ຫຼື G20 ໄດ້ຈັດຂຶ້ນຢູ່ເມືອງບອນ ປະເທດເຢຍລະມັນໃນວັນທີ 16 ກຸມພານີ້ ໂດຍຜູ້ແທນທີ່ຮ່ວມປະຊຸມຈະປຶກສາຫາລື 3 ຫົວຂໍ້ ຄື ການຈັດຕັ້ງປະຕິບັດວາລະ 2030 ກ່ຽວກັບການພັດທະນາທີ່ຍືນຍົງ, ການປົກປັກຮັກສາສັນຕິພາບ ແລະ ການເພີ່ມທະວີການພົວພັນກັບຄູ່ຮ່ວມອາຟຣິກາ ເພື່ອກະກຽມໃຫ້ແກ່ກອງປະຊຸມສຸດຍອດຮຳເບິກຂອງ G20 ທີ່ຈະຈັດຂຶ້ນໃນເດືອນກໍລະກົດປີນີ້.
ກອງປະຊຸມທີ່ຈະດຳເນີນເປັນເວລາ 2 ວັນນັ້ນ ໄດ້ແບ່ງອອກເປັນ 2 ໄລຍະ ໂດຍໄລຍະທີ 1 ຈະສຸມໃສ່ປຶກສາຫາລືແລະຈັດຕັ້ງປະຕິບັດວາລະ 2030 ກ່ຽວກັບການພັດທະນາທີ່ຍືນຍົງ ແລະໄລຍະທີ 2 ຈະສຸມໃສ່ປຶກສາຫາລືການປ້ອງກັນບໍ່ໃຫ້ເກີດການປະທະກັນ ແລະອື່ນໆ.
ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນ, ທ່ານເຣັກ ຕີເລີເຊີນ ລັດຖະມົນຕີກະຊວງການຕ່າງປະເທດອາເມລິກາ, ທ່ານເຊີແກ ລາວຼົຟ ລັດຖະມົນຕີກະຊວງການຕ່າງປະເທດຣັດເຊຍ ແລະ ຜູ້ແທນປະເທດອື່ນໆ ທີ່ເປັນສະມາຊິກ G20 ໄດ້ເຂົ້າຮ່ວມກອງປະຊຸມ, ຂະນະທີ່ຜູ້ແທນຈາກປະເທດໂຮນລັງ, ນອກແວ, ສິງກະໂປ, ແອສປາຍ ພ້ອມດ້ວຍອົງການສະຫະປະຊາຊາດ, ອົງການອາເປັກ, ສະຫະພາບອາຟຣິກາ ແລະອື່ນໆ ກໍໄດ້ເຂົ້າຮ່ວມກອງປະຊຸມຕາມຄຳເຊີນເຊັ່ນດຽວກັນ.
