ວັນທີ 16 ແລະ 17 ກຸມພານີ້ ຕາມເວລາທ້ອງຖິ່ນ, ທ່ານຫວາງອີ້ ລັດຖະມົນຕີກະຊວງການຕ່າງປະເທດຈີນໄດ້ເດີນທາງໄປເຂົ້າຮ່ວມກອງປະຊຸມລັດຖະມົນຕີການຕ່າງປະເທດ G20 ຢູ່ເມືອງໂບນປະເທດເຢຍລະມັນ, ໃນທີ່ປະຊຸມ, ທ່ານໄດ້ບັນລະຍາຍກ່ຽວກັບຫຼັກໝັ້ນຫຼັກການແລະເຈດຈຳນົງຂອງຝ່າຍຈີນໂດຍປິ່ນອ້ອມຫົວຂໍ້ຕ່າງໆເຊັ່ນການຜັນຂະຫຍາຍວຽກງານຕ່າງໆກ່ຽວກັບການພັດທະນາແບບຍືນຍົງປີ 2030, ການພົວພັນຄູ່ຮ່ວມມືກັບອາຟຼິກາ, ການປົກປັກຮັກສາສັນຕິພາບໃນໂລກທີ່ສັບສົນ ແລະອື່ນໆ.
ທ່ານຫວາງອີ້ກ່າວວ່າ: ເພື່ອຜັນຂະຫຍາຍວຽກງານຕ່າງໆກ່ຽວກັບການພັດທະນາແບບຍືນຍົງປີ 2030 ໃຫ້ດີ, ຈີນມີເຈດຈຳນົງໃຫ້ປະຊາຄົມໂລກສ້າງສະພາບແວດລ້ອມສາກົນທີ່ມີສັນຕິພາບແລະສະເຖຍລະພາບ, ສ້າງເສດຖະກິດໂລກທີ່ມີຫົວຄິດປະດິດສ້າງ ຮ່ວມມືກັນ ເປີດປະຕູແລະເຊື່ອມໂຍງເຂົ້າກັນ, ລິເລີ່ມແນວຄິດທີ່ຊົມໃຊ້ການພັດທະນາຮ່ວມກັນ, ສ້າງການພົວພັນຄູ່ຮ່ວມມືພັດທະນາທົ່ວໂລກແບບໃໝ່, ແລະຈັດວຽກງານການພັດທະນາແບບຍືນຍົງເຂົ້າໃນຍຸດທະສາດພັດທະນາຂອງປະເທດຕົນ. ຈີນເຫັນວ່າ: ຄວນຍຶດໝັ້ນເຮັດໃຫ້ສັນຕິພາບແລະການພັດທະນາໄປພ້ອມກັນ, ແລະເຄົາລົບຄວາມປາຖະໜາຂອງບັນດາປະເທດອາຟຼິກາ, ໃຊ້ມາດຕະການລະອຽດເພື່ອສະໜັບສະໜູນສ້າງການພົວພັນຄູ່ຮ່ວມມືກັບອາຟຼິກາ. ຈີນກຳລັງປະຕິບັດແນວຄິດນະໂຍບາຍຕໍ່ອາຟຼິກາທີ່"ມີຄວາມຈິງໃຈ ມີຜົນປະໂຫຍດແທ້ຈິງ ສະໜິດສະໜົມແລະມີຄວາມຊື່ສັດ"ດ້ວຍການກະທຳຕົວຈິງຂອງຕົນ.
ທ່ານຫວາງອີ້ກ່າວເນັ້ນວ່າ: ຈີນຍຶດໝັ້ນເດີນຕາມເສັ້ນທາງພັດທະນາໂດຍສັນຕິຢ່າງສະເໝີຕົ້ນສະເໝີປາຍ, ເປັນຜູ້ປົກປັກຮັກສາແລະຜູ້ສ້າງສາສັນຕິພາບຖາວອນຂອງໂລກຢ່າງໝັ້ນໜຽວບໍ່ປ່ຽນແປງ, ຍິນດີຮ່ວມສ້າງສາແລະຊົມໃຊ້ໂລກທີ່ມີສັນຕິພາບຖາວອນແລະມີຄວາມປອດໄພໂດຍທົ່ວໄປກັບປະຊາຄົມໂລກບົນພື້ນຖານແນວຄິດປະຊາຄົມຮ່ວມຊາຕາກຳຂອງມວນມະນຸດທີ່ສະເໜີໂດຍທ່ານສີຈິ້ນຜິງ ປະທານປະເທດຈີນ.