ວັນທີ 17 ກຸມພານີ້, ທ່ານຫວາງອີ້, ລັດຖະມົນຕີກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມຄວາມໝັ້ນຄົງມູນິກຄັ້ງທີ 53 ຢູ່ນະຄອນມູນິກຂອງເຢຍລະມັນ, ແລະໄດ້ກ່າວຄຳປາໄສທີ່ມີຫົວຂໍ້ວ່າ "ຍຶດໝັ້ນທັດສະນະທີ່ມີການຮ່ວມມື, ໃຫ້ການຕັດສິນຢ່າງຖືກຕ້ອງ". ມີລັດຖະມົນຕີກະຊວງການຕ່າງປະເທດຂອງໂປໂລຍ, ອຸແກຼນ, ແອສປາຍ, ອັງກິດ, ໂຮນລັງແລະອະດີດບຸກຄົນສຳຄັນທາງການເມືອງຫຼາຍທ່ານ, ພ້ອມດ້ວຍຊ່ຽວຊານແລະນັກວິທະຍາສາດ 300 ກວ່າຄົນເຂົ້າຮ່ວມ.
ທ່ານຫວາງອີ້ກ່າວວ່າ, ໃນຕົ້ນປີນີ້, ທ່ານປະທານສີຈີນຜີງໄດ້ໃຫ້ການປະຖະກະຖາສຳຄັນ 2 ເທື່ອຢູ່ນະຄອນດາວໍສແລະນະຄອນເຊີແນວ, ໂດຍທ່ານໄດ້ສະເໜີວ່າຕ້ອງຮ່ວມກັນສ້າງປະຊາຄົມໂຊກຊະຕາຂອງມວນມະນຸດ, ບັນລຸການໄດ້ຮັບຜົນປະໂຫຍດຮ່ວມກັນ. ນີ້ແມ່ນແຜນການຈີນຍ້ອນຈີນໄດ້ກຳກົດແກນປະຫວັດສາດແລະກະແສຂອງຍຸສະໄໝ, ເອົາໃຈໃສ່ຕໍ່ປະໂຫຍດຮ່ວມກັນແລະໄລຍະຍາວຂອງມວນມະນຸດ, ໄດ້ຮັບຄວາມເອົາໃຈໃສ່ເປັນຢ່າງສູງແລະໄດ້ຮັບການຍ້ອງຍໍຢ່າງກວ້າງຂວາງຈາກຝ່າຍຕ່າງໆ.
ທ່ານຫວາງອີ້ກ່າວວ່າ, ຄວາມມີສັນຕິພາບແລະການພັດທະນາຍັງແມ່ນກະແສຕົ້ນຕໍຂອງໂລກໃນປັດຈຸບັນນີ້. ການແກ້ໄຂສິ່ງທ້າທາຍຕ່າງໆທີ່ໂລກກຳລັງປະເຊີນໃນປັດຈຸບັນນີ້, ຕ້ອງການການຍຶດໝັ້ນລັດທິຫຼາຍຝ່າຍ, ເພີ່ມທະວີການຮ່ວມມືລະຫວ່າງບັນດາປະເທດໃຫຍ່ຢ່າງຕໍ່ເນື່ອງ, ພະຍາຍາມປັບປຸງການປົວແປງທົ່ວໂລກໃຫ້ສົມບູນກວ່າເກົ່າ, ຍຶດໝັ້ນເລັ່ງລັດຂະບວນການການຮ່ວມມືໃນພາກພື້ນຕ່າງໆ. ຈີນຈະສືບຕໍ່ປະຕິບັດວຽກງານຂອງຕົນໃຫ້ດີ, ຈະປະຕິຮູບໃຫ້ເລິກເຊິ່ງກວ່າເກົ່າຮອບດ້ານຢ່າງໝັ້ນໜຽວບໍ່ປ່ຽນແປງ, ເປີດກວ້າງການເປີດປະຕູສູ່ໂລກພາຍນອກ, ເປັນຜູ້ສ້າງສັນຕິພາບຂອງໂລກ, ຜູ້ປະກອບສ່ວນດ້ານການພັດທະນາຂອງໂລກ, ຜູ້ປົກປັກຮັກສາລັດທິຫຼາຍຝ່າຍ, ດ້ວຍການພັດທະນາຂອງຕົນພ້ອມທັງໃຫ້ການປະກອບສ່ວນໃໝ່ເຂົ້າໃນພາລະກິດສັນຕິພາບແລະການພັດທະນາຂອງມວນມະນຸດ.
 |
