ທ່ານຢາຄົບ ອີບຣາຮິມ ລັດຖະມົນຕີກະຊວງການສື່ສານແລະຖະແຫຼງຂ່າວສິງກະໂປ ໄດ້ອອກຖະແຫຼງການໃນວັນທີ 17 ກຸມພານີ້ ໂດຍປະກາດວ່າຈະປ່ຽນຊື່ "ຫໍວາງສະແດງໂຊນານ: ສົງຄາມແລະຮ່ອງຮອຍປະຫວັດສາດ" ທີ່ຫາກໍເປີດບໍລິການໃນວັນທີ 15 ກຸມພານີ້ ເປັນ "ສະໄໝຍີ່ປຸ່ນຍຶດຄອງ: ສົງຄາມແລະຮ່ອງຮອຍປະຫວັດສາດ".
ຫຼັງຫຼາຍມື້ຜ່ານມາໄດ້ຕັ້ງຊື່ "ຫໍວາງສະແດງໂຊນານ" ໄດ້ເຮັດໃຫ້ມີການວິພາກວິຈານກັນຫຼາຍໃນທົ່ວສັງຄົມສິງກະໂປ ເນື່ອງຈາກໃນສະໄໝສົງຄາມໂລກຄັ້ງທີ 2, ຍີ່ປຸ່ນໄດ້ເຂົ້າຍຶດຄອງສິງກະໂປ ແລະ ເຂັ່ນຂ້າປະຊາຊົນຫຼາຍໝື່ນຄົນ ທັງໄດ້ປ່ຽນຊື່ສິງກະໂປໃຫ້ເປັນ "ເກາະໂຊນານ". ບຸກຄົນທີ່ມີອິດທິພົນໃນສັງຄົມຫຼາຍທ່ານ ຊີ້ວ່າ: ການໃຊ້ສອງຕົວໜັງສື "ໂຊນານ" ນີ້ມາຕັ້ງເປັນຊື່ຫໍວາງສະແດງປະຫວັດສາດອັນເຈັບແສບດັ່ງກ່າວ ເປັນການກະທຳບໍ່ເໝາະສົມ.
ທ່ານຢາຄົບ ໄດ້ລະບຸໃນຖະແຫຼງການດັ່ງກ່າວວ່າ: ຜ່ານການພິຈາລະນາຢ່າງລະອຽດ ຈຶ່ງຕົກລົງບໍ່ໃຊ້ຊື່ "ຫໍວາງສະແດງໂຊນານ" ນີ້ອີກ ແລະປ່ຽນມາໃຊ້ຊື່ "ສະໄໝຍີ່ປຸ່ນຍຶດຄອງ: ສົງຄາມແລະຮ່ອງຮອຍປະຫວັດສາດ".
ທ່ານຢາຄົບ ກ່າວວ່າ: ຈະຕ້ອງເຄົາລົບຄວາມຮູ້ສຶກຂອງປະຊາຊົນຜູ້ຕົກທຸກໄດ້ຍາກ ແລະ ຜູ້ທີ່ສູນເສຍສະມາຊິກຄອບຄົວໃນສະໄໝທີ່ຖືກຍີ່ປຸ່ນຍຶດຄອງ. ແນວໃດກໍດີ, ຕົນຂໍຂະມາໂທດຢ່າງສຸດຊຶ້ງຕໍ່ປະຊາຊົນບາງຄົນທີ່ຖືກທຳຮ້າຍຈາກຊື່ຂອງຫໍວາງສະແດງດັ່ງກ່າວ.
