ຂະນະທີ່ທ່ານໂດນັນ ທຣຳ ຂຶ້ນຮັບຕຳແໜ່ງປະທານາທິບໍດີອາເມລິກາຄົບຮອບ 1 ເດືອນ, ຢູ່ຫຼາຍຕົວເມືອງຂອງປະເທດດັ່ງກ່າວ ເຊັ່ນ ນະຄອນນິວຢອກ, ເມືອງຊີຄາໂກ ແລະ ເມືອງໂບສຕັນ ໄດ້ເກີດການຊຸມນຸມແລະແຫ່ຂະບວນໃນວັນທີ 19 ກຸມພານີ້ ເພື່ອປະທ້ວງນະໂຍບາຍໃໝ່ທີ່ມີການວິພາກວິຈານກັນຢ່າງໜາຫູ ເຊັ່ນ ການຈຳກັດຕໍ່ຊາວອົບພະຍົບທີ່ລັດຖະບານປະກາດໃຊ້ເມື່ອບໍ່ດົນນີ້.
ໃນວັນດັ່ງກ່າວ, ຊາວນິວຢອກພັນກວ່າຄົນໄດ້ຈັດການຊຸມນຸມດ້ວຍຄຳຂວັນ "ມື້ນີ້ຂ້າພະເຈົ້າກໍແມ່ນຊາວມຸສລິມ" ຢູ່ສະໜາມຫຼວງທາມສ໌ ເພື່ອປະທ້ວງດຳລັດປະທານາທິບໍດີທຣຳ ທີ່ຫ້າມບໍ່ໃຫ້ຊາວອົບພະຍົບລີ້ໄພທົ່ວໂລກ ແລະ ຫ້າມພົນລະເມືອງຂອງ 7 ປະເທດອາຊີຕາເວັນຕົກແລະອາຟຣິກາເໜືອເຂົ້າເມືອງ ທີ່ປະຕິບັດຊົ່ວຄາວ.
ທັງນີ້, ຫຼັງທ່ານທຣຳ ຂຶ້ນດຳລົງຕຳແໜ່ງປະທານາທິບໍດີ ກໍໄດ້ປະກາດໃຊ້ຫຼາຍນະໂຍບາຍເພື່ອຈຳກັດຊາວອົບພະຍົບເຂົ້າປະເທດຕົນ ທັງເພີ່ມຄວາມເຂັ້ມງວດໃນການແກ້ໄຂບັນຫາຊາວອົບພະຍົບຜິດກົດໝາຍພາຍໃນອາເມລິກາ ເຊິ່ງມາດຕະການເຫຼົ່ານີ້ ກໍຖືກປະຊາຊົນແຫ່ງຕ່າງໆທົ່ວປະເທດອາເມລິກາປະທ້ວງ ແລະ ຖືກຫຼາຍປະເທດໃນໂລກຕຳໜິ, ຂະນະດຽວກັນກໍປະສົບການແຊກແຊງແລະສະກັດກັ້ນຈາກລະບົບຍຸຕິທຳອາເມລິກາເຊັ່ນດຽວກັນ.
