ສະພາສູງຂອງອັງກິດເລີ່ມພິຈາລະນາຮ່າງກົດໝາຍວ່າດ້ວຍການຖອນອອກຈາກສະຫະພາບເອີຣົບຫຼືອີຢູໃນວັນທີ 20 ກຸມພານີ້ຫຼັງຕົ້ນເດືອນດຽວກັນ,ສະພາຕ່ຳ ໄດ້ຮັບຮອງຮ່າງກົດໝາຍດັ່ງກ່າວດ້ວຍສຽງສ່ວນຫຼາຍຄື 494 ບັດເຫັນດີ, 122 ບັດຄັດຄ້ານ, ທັງມອບຮ່າງກົດໝາຍສະບັບນີ້ໃຫ້ສະພາສູງນຳໄປພິຈາລະນາ. ທັງນີ້,ຖ້າຫາກສະພາສູງກໍຮັບຮອງຮ່າງກົດໝາຍດັ່ງກ່າວ, ອັງກິດກໍຈະເລີ່ມປະຕິບັດຂັ້ນຕອນຖອນອອກຈາກສະຫະພາບເອີຣົບກ່ອນທ້າຍເດືອນມີນາທີ່ຈະມາເຖິງ.
ທ່ານນາງເຕເຣຊາເມ ນາຍົກລັດຖະມົນຕີອັງກິດໄດ້ເຂົ້າຟັງການອະພິປາຍຂອງບັນດາສະມາຊິກສະພາກ່ຽວກັບຮ່າງກົດໝາຍໃນວັນທີ 20 ກຸມພານີ້ເຊິ່ງຕາມທຳນຽມລັດຖະທຳມະນູນຂອງອັງກິດ, ນາຍົກລັດຖະມົນຕີມີສິດອະພິປາຍໃນເວລາສະພາຕ່ຳພິຈາລະນາຮ່າງກົດໝາຍ, ແຕ່ບໍ່ມີສິດຮ່ວມອະພິປາຍຂອງສະພາສູງ, ພຽງແຕ່ເຖິງເວລາທີ່ສຳຄັນທີ່ສຸດຈິ່ງຈະໄປເຂົ້າຟັງການອະພິປາຍຢູ່ສະພາສູງ.
ໃນມື້ອະພິປາຍຂອງສະພາສູງ, ປະຊາຊົນອັງກິດຈຳນວນໜຶ່ງກໍໄດ້ແຫ່ຂະບວນປະທ້ວງຢູ່ນອກຕຶກລັດຖະສະພາໂດຍຮຽກຮ້ອງໃຫ້ລັດຖະສະພາປົກປ້ອງສິດທີ່ຊອບດ້ວຍກົດໝາຍຂອງພົນລະເມືອງສະຫະພາບເອີຣົບທີ່ດຳລົງຊີວິດຢູ່ອັງກິດ.