ໜັງສືພິມໂຣດົງຊິມູນ ສຽງຂອງສູນກາງພັກແຮງງານສປປ ເກົາຫຼີສະບັບວັນທີ 21 ກຸມພານີ້ໄດ້ລົງພິມບົດວິຈານໂດຍກ່າວປະນາມວ່າການຊ້ອມຮົມຮ່ວມອາເມລິກາ-ສ ເກົາຫຼີທີ່ຈະຈັດຂຶ້ນໃນເດືອນມີນາທີ່ຈະມາເຖິງນັ້ນເປັນການຊ້ອມຮົບສົງຄາມຮຸກຮານທີ່ເລັງເປົ້າໃສ່ປະເທດຕົນຫຼັງຢ້ຳມາຕະຫຼອດຈະໂຈມຕີດ້ວຍອາວຸດນິວເຄລຍກ່ອນ.
ເນື້ອໃນບົດຄວາມຂຽນວ່າ: ການຊ້ອມຮົບຮ່ວມປີນີ້ຈະມີຂະໜາດໃຫຍ່ທີ່ສຸດໃນປະຫວັດສາດ ເຊິ່ງຈະເຮັດໃຫ້ສະຖານະການກາຍເປັນຄວາມອັນຕະລາຍທີ່ສຸດ. ການຊ້ອມຮົບຮ່ວມອາເມລິກາ-ສ ເກົາຫຼີບໍ່ພຽງແຕ່ຈະກະຕຸ້ນສະຖານະການຢູ່ແຫຼມເກົາຫຼີແລະພາກພື້ນໃຫ້ຮຸນແຮງຂຶ້ນເທົ່ານັ້ນ ແຕ່ຍັງຈະສ້າງສະພາບທີ່ຈະເກີດສົງຄາມໄດ້ທຸກເວລາ. ທັງນີ້ໃນການຊ້ອມຮົມດັ່ງກ່າວຈະປະຕິບັດແຜນສູ້ຮົບ4Dແລະຝຶກຊ້ອມລະບົບຕ້ານຂີປະນາວຸດ "THAAD" ໂດຍຈະເປັນໄພຂົ່ມຂູ່ຢ່າງໜັກໜ່ວງຕໍ່ຄວາມໝັ້ນຄົງຂອງປະເທດອ້ອມຂ້າງແຫຼມເກົາຫຼີ,ຂະນະທີ່ກວົງການຕ່າງໆຈະອອກມາຕຳໜິຢ່າງຮຸນແຮງ.
ນັບແຕ່ແຫຼມເກົາຫຼີຢຸດຍິງເມື່ອປີ 1953 ເປັນຕົ້ນມາ, ສ ເກົາຫຼີແລະອາເມລິກາໄດ້ຈັດການຊ້ອມຮົບຮ່ວມຢ່າງຂະໜາດໃຫຍ່ທຸກປີ, ສ່ວນສປປ ເກົາຫຼີກໍໄດ້ສະແດງຄວາມບໍ່ພໍໃຈຢ່າງຮຸນແຮງຕໍ່ການຊ້ອມຮົບຮ່ວມດັ່ງກ່າວ ແລະຖືເປັນມາດຕະການຂົ່ມຂູ່ທີ່ເປັນປໍລະປັກກັບສປປ ເກົາຫຼີມາໂດຍຕະຫຼອດ.
 |
