ຂະແໜງການປະຕິບັດກົດໝາຍຂອງຈີນ, ລາວ, ມຽນມາ ແລະ ໄທ ໄດ້ເລີ່ມຕົ້ນການລາດຕະເວນແລະປະຕິບັດກົດໝາຍຮ່ວມຕາມລຳແມ່ນ້ຳຂອງຄັ້ງທີ 55 ຢູ່ທ່າເຮືອກ່ວນເລີ້ຍ ກິ່ງແຂວງສິບສອງພັ່ນນາ ແຂວງຢຸນນານ ສປ ຈີນ ໃນວັນທີ 21 ກຸມພານີ້ ເພື່ອເພີ່ມຄວາມເຂັ້ມງວດໃນການແກ້ໄຂບັນຫາຄວາມບໍ່ສະຫງົບຕາມເຂດລ້ອງແມ່ນ້ຳຂອງທີ່ພົ້ນເດັ່ນຂຶ້ນ. ການລາດຕະເວນປະຕິບັດກົດໝາຍຮ່ວມເທື່ອນີ້ຈະເດີນທາງກວ່າ 500 ກິໂລແມັດ ແລະຜ່ານຊາຍແດນທາງນ້ຳຈຸດຕິດຈອດກັນລະຫວ່າວຈີນ-ມຽນມາ ແລະ ລາວ-ມຽນມາ.
ກ່ອນໜ້ານີ້, ຂະແໜງການປະຕິບັດກົດໝາຍຂອງ 4 ປະເທດໄດ້ຈັດກອງປະຊຸມແລກປ່ຽນຂໍ້ມູນຂ່າວສານ ແລະ ກອງປະຊຸມຮ່ວມຜູ້ບັນຊາການ ຢູ່ກິ່ງແຂວາງສິບສອງພັ່ນນາ ເພື່ອແຈ້ງສະພາບການເຄື່ອນໄຫວຕ່າງໆທີ່ຜິດກົດໝາຍແລະອາຊະຍາກຳຂ້າມຊາດໃຫ້ກັນຊາບ ແລະຮ່ວມສຶກສາວິເຄາະສະພາບຄວາມສະຫງົບແລະບັນຫາພົ້ນເດັ່ນໃນເຂດແມ່ນ້ຳຂອງ ທັງຫາລືແລະຕົກລົງແຜນການເຄື່ອນໄຫວແລະແຜນຮັບມືລ່ວງໜ້າ ເພື່ອເຮັດໃຫ້ການລາດຕະເວນແລະປະຕິບັດກົດໝາຍຢ່າງມີຈຸດສຸມແລະມີຄວາມແນ່ນອນຍິ່ງຂຶ້ນ ທັງຮັບປະກັນໃຫ້ການເຄື່ອນໄຫວເທື່ອນີ້ບັນລຸຜົນສຳເລັດຕາມຄາດໝາຍ.
