ທ່ານສະຕາເຟນ ເດີ ມິສຕູຣາ ທູດພິເສດເລຂາທິການໃຫຍ່ອົງການສະຫະປະຊາຊາດກ່ຽວກັບບັນຫາຊີຣີ ໄດ້ກ່າວໃນພິທີຖະແຫຼງຂ່າວຢູ່ເຊີແນວ ປະເທດສະວິສ ໃນວັນທີ 22 ກຸມພານີ້ວ່າ: ການເຈລະຈາສັນຕິພາບຊີຣີຮອບໃໝ່ຈະເລີ່ມຂຶ້ນຢູ່ເຊີແນວແຕ່ວັນທີ 23 ເດືອນນີ້ເປັນຕົ້ນໄປ, ຂະນະທີ່ຈຸດສຳຄັນຂອງການເຈລະຈາຮອບໃໝ່ນີ້ຈະເນັ້ນຊຸກຍູ້ຂະບວນການແກ້ໄຂວິກິດການຊີຣີທາງການເມືອງ ໂດຍອີງຕາມແຜນທີ່ລະບຸໄວ້ໃນມະຕິຕົກລົງເລກທີ 2254 ຂອງສະພາຄວາມໝັ້ນຄົງອົງການສະຫະປະຊາຊາດ.
ຂ່າວແຈ້ງວ່າ, ການເຈລະຈາສັນຕິພາບຮອບນີ້ຈະສຸມໃສ່ປຶກສາຫາລື 3 ບັນຫາ ຄື ໜຶ່ງ, ສ້າງຕັ້ງລັດຖະບານຊົ່ວຄາວທີ່ເຊື່ອຖືໄດ້, ກວມລວມ ແລະບໍ່ກ່ຽວກັບສາສະໜາ. ສອງ, ຮ່າງລັດຖະທຳມະນູນສະບັບໃໝ່ ແລະ ກຳນົດຕາຕະລາງເວລາ ແລະ ສາມ, ພາຍໃຕ້ການຕິດຕາມຂອງອົງການສະຫະປະຊາຊາດ ແລະ ເງື່ອນໄຂເບື້ອງຕົ້ນທີ່ຮັບຜິດຂອບເພື່ອປະຊາຊົນຊີຣີທຸກຖ້ວນໜ້າ ຮັບປະກັນການເລືອກຕັ້ງທົ່ວໄປຂອງຊີຣີຢ່າງເສລີພາບແລະທ່ຽງທຳ ຕາມມາດຕະຖານສູງສຸດຂອງສາກົນ.
ທ່ານເດີ ມິສຕູຣາ ກ່າວຕື່ມວ່າ: ຕົນບໍ່ໄດ້ຄາດໝາຍວ່າການເຈລະຈາສັນຕິພາບຮອບນີ້ຈະບຸກທະລຸໃນບາງບັນຫາຫຼືບໍ່ ແຕ່ກໍຫວັງວ່າຝ່າຍຕ່າງໆຈະສະແດງໃຫ້ເຫັນເຖິງທ່າທີທີ່ຊຸກຍູ້ການແກ້ໄຂບັນຫາດ້ວຍຊ່ອງທາງການເມືອງ.