ຕາມຂ່າວສານຈີນ: ກອງປະຊຸມເວທີປຶກສາຫາລືປ່ຽນແປງວິທີການເຕີບໂຕແລະການພັດທະນາຂອງວິສາຫະກິດບໍ່ຂຶ້ນກັບລັດເຂດກວາງຊີ 2017 ແລະກອງປະຊຸມທີ່ກ່ຽວຂ້ອງ ໄດ້ຈັດຂຶ້ນຢູ່ເມືອງໜານໜິງ ແຕ່ວັນທີ 22 ຫາ 23 ກຸມພານີ້ ແລະໃນໂອກາດດັ່ງກ່າວ, ທ່ານອີ້ເວເຟິງ ຜູ້ຊ່ວຍຫົວໜ້າສະຖາບັນການຄ້າ ທັງເປັນສາສະດາຈານຄະນະເສດຖະກິດແລະການທະນາຄານຂອງມະຫາວິທະຍາໄລຕົວເມືອງຮົງກົງໄດ້ໃຫ້ສຳພາດຕໍ່ນັກຂ່າວວ່າ ຄຽງຄູ່ກັບການເຊັນສັນຍາຍົກລະດັບເຂດການຄ້າເສລີຈີນ-ອາຊຽນ, ຂະແໜງການຜະລິດຈະກາຍເປັນຂະແໜງການບູລິມະສິດສຳລັບວິສາຫະກິດເອກະຊົນຂອງຈີນທີ່ໄປລົງທຶນຢູ່ອາຊຽນ.
ທ່ານອີ້ເວເຟິງກ່າວວ່າ, ທຸກທ່ານມີຄວາມເຫັນໄປໃນແງ່ດີຕໍ່ເສດຖະກິດຂອງລາວ, ຫວຽດນາມ, ມາເລເຊຍ ແລະຟີລິບປິນ, ຂະນະທີ່ຈີນກັບປະເທດເຫຼົ່ານີ້ໄດ້ເພີ່ມຄວາມເຂົ້າໃຈກັນ, ຈາກນີ້ວິສາຫະກິດເອກະຊົນຂອງຈີນຈະເລັ່ງບາດກ້າວໄປລົງທຶນຢູ່ປະເທດເຫຼົ່ານີ້.
ທ່ານຢາງໄຫ ຜູ້ຊ່ຽວຊານຮົງກົງທີ່ຄົ້ນຄວ້າຂະແໜງວິຊາຈຳໜ່າຍໃນຕະຫຼາດກໍກ່າວວ່າ, ເພື່ອຫຼີກເວັ້ນຄວາມຂັດແຍ້ງດ້ານການຄ້າລະຫວ່າງຈີນກັບອາເມລິກາໄດ້, ມີຫຼາຍວິສາຫະກິດໄປລົງທຶນຢູ່ຕ່າງປະເທດ ແລະເນື່ອງຈາກປະເທດອາຊຽນໃກ້ກັບຈີນ ແລະຍັງມີສັນຍາການຄ້າເສລີກັບຈີນນັ້ນ, ປະເທດອາຊຽນຈິ່ງໄດ້ກາຍເປັນຈຸດໝາຍປາຍທາງບູລິມະສິດດ້ານການລົງທຶນຂອງວິສາຫະກິດຈີນ.