ການເຈລະຈາສັນຕິພາບກ່ຽວກັບບັນຫາຊີຣີທີ່ຢຸດຊະງັກເຖິງ 10 ເດືອນນັ້ນ ໄດ້ເລີ່ມຕົ້ນໃໝ່ແລ້ວໃນວັນທີ 23 ກຸມພານີ້ຢູ່ເຊີແນວ ໂດຍທ່ານສະຕາເຟນ ເດີ ມິສຕູຣາ ທູດພິເສດເລຂາທິການໃຫຍ່ອົງການສະຫະປະຊາຊາດກ່ຽວກັບບັນຫາຊີຣີ ໄດ້ຢືນຢັນຕໍ່ສື່ມວນຊົນໃນວັນດັ່ງກ່າວວ່າ: ຕົນຈະປຶກສາຫາລືກັບຄະນະຜູ້ແທນລັດຖະບານຊີຣີໃນຕອນຄ່ຳວັນທີ 23 ແລະ ຄະນະຜູ້ແທນຝ່າຍຕໍ່ຕ້ານໃນວັນທີ 24 ເພື່ອສາມາດກ້າວໄປສູ່ການບັນລຸການຕົກລົງໃນຂໍ້ປີກຍ່ອຍຕ່າງໆ ເຊັ່ນ ເວລາທີ່ຈະແຈ້ງແລະຮູບການເຈລະຈາຮອບນີ້ເປັນຕົ້ນ ແລະເຮັດໃຫ້ການເຈລະຈາເຂົ້າສູ່ການປຶກສາຫາລືເນື້ອແທ້ໄດ້ໄວເທົ່າທີ່ຈະໄວໄດ້.
ທ່ານເດີ ມິສຕູຣາ ກ່າວຕື່ມວ່າ: ບັນຫາຕົ້ນຕໍຂອງການເຈລະຈາສັນຕິພາບຮອບນີ້ຍັງຄົງເນັ້ນໃສ່ປຶກສາຫາລືການສ້າງຕັ້ງລັດຖະບານຊົ່ວຄາວ, ການສ້າງລັດຖະທຳມະນູນສະບັບໃໝ່ ລວມທັງຈະດຳເນີນການເລືອກຕັ້ງທົ່ວໄປຂຶ້ນໃໝ່ແນວໃດ ແລະອື່ນໆ ໂດຍທັງໝົດນີ້ຢູ່ບົນພື້ນຖານຕາມຄວາມຮຽກຮ້ອງທີ່ລະບຸໄວ້ໃນມະຕິຕົກລົງເລກທີ 2254 ຂອງສະພາຄວາມໝັ້ນຄົງອົງການສະຫະປະຊາຊາດ.
