ທ່ານຊົ້ງທ່າວ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ໄດ້ນຳພາຄະນະຜູ້ແທນພັກກອມມູນິດຈີນເດີນທາງຢ້ຽມຢາມຟິລິບປິນແຕ່ວັນທີ 19-22 ກຸມພານີ້. ຂະນະທີ່ທ່ານໂຣດຣີໂກ ດູເຕີເຕ ປະທານພັກພະລັງປະຊາຊົນປະຊາທິປະໄຕ, ປະທານາທິບໍດີຟິລິບປິນ ກ່າວວ່າ ສົນໃຈສູງຕໍ່ບົດຮຽນການປົກຄອງປະເທດແລະການຄຸ້ມຄອງລັດຂອງພັກກອມມູນິດຈີນ ໃນໂອກາດຕ້ອນຮັບການເຂົ້າຢ້ຽມຄຳນັບຄະນະຜູ້ແທນພັກກອມມູນິດຈີນ.
ທ່ານດູເຕີເຕ ກ່າວວ່າ: ຟິລິບປິນຫວັງໃຫ້ສອງປະເທດເພີ່ມທະວີການຮ່ວມມືທີ່ແທ້ຈິງຢ່າງຮອບດ້ານ ເຊິ່ງພັກພະລັງປະຊາຊົນປະຊາທິປະໄຕ ກໍຍິນດີເພີ່ມທະວີການໄປມາແລກປ່ຽນຕາມກົນໄກ ແລະ ຊຸກຍູ້ຄວາມໄວ້ເນື້ອເຊື່ອໃຈແລະການຮ່ວມມືໃຫ້ເຂົ້າສູ່ລວງເລິກ. ນອກນີ້, ທ່ານດູເຕີເຕ ຍັງໄດ້ຢືນຢັນຫຼາຍເທື່ອຕໍ່ທ່ານຊົ້ງທ່າວ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນວ່າ: ຕົນມີຄວາມສົນໃຈບົດຮຽນການປົກຄອງປະເທດແລະການຄຸ້ມຄອງລັດຂອງພັກກອມມູນິດຈີນທີ່ສຸດ ແລະຈະສົ່ງພະນັກງານພັກຂອງຕົນ ກໍຄືຜູ້ນຳທ້ອງຖິ່ນປະເທດຕົນໄປແລກປ່ຽນແລະສຶກສາຄົ້ນຄວ້າຢູ່ຈີນໂດຍໄວ.
ຫຼັງສຳເລັດການພົບປະ, ທ່ານດູເຕີເຕ ປະທານາທິບໍດີຟິລິບປິນກໍໄດ້ເປັນສັກຂີພິຍານໃນການລົງນາມໃນບົດບັນທຶກຂອງທ່ານຊົ້ງທ່າວ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ແລະ ທ່ານອາກີລີໂນ ປີເມນເຕວ ຫົວໜ້າພັກພະລັງປະຊາຊົນປະຊາທິປະໄຕ, ປະທານສະພາສູງຟິລິບປິນ ວ່າດ້ວຍການແລກປ່ຽນແລະຮ່ວມມືລະຫວ່າງພັກກອມມູນິດຈີນ-ພັກພະລັງປະຊາຊົນປະຊາທິປະໄຕຟິລິບປິນ ເຊິ່ງເປັນຂີດໝາຍສະແດງໃຫ້ເຫັນວ່າ ພັກກຳອຳນາດຂອງຈີນແລະຟິລິບປິນໄດ້ໄຂສັງກາດໃໝ່ແຫ່ງການແລກປ່ຽນກັນຕາມກົນໄກຢ່າງເປັນທາງການ.
