ຕາມຂ່າວສານຊິນຮວາ: ຫວ່າງແລ້ວນີ້, ທ່ານອາຄົມ ເຕີມພິດທະຍະໄພສິດ ລັດຖະມົນຕີກະຊວງຄົມມະນາຄົມໄທກ່າວວ່າ, ປີນີ້ຈະຊຸກຍູ້ການພັດທະນາລະບົບຄົມມະນາຄົມ 36 ໂຄງການ ເຊັ່ນ: ທາງລົດໄຟ, ທາງລົດໄຟໃນເມືອງແລະອື່ນໆ ໂດຍຈະລົງທຶນຫຼາຍກວ່າ 25 ຕື້ໂດລາສະຫະລັດ.
ກະຊວງຄົມມະນາຄົມໄທເປີດເຜີຍວ່າ, ການລົງທຶນດັ່ງກ່າວມີ 45,62% ຈະໃຊ້ເຂົ້າໃນການກໍ່ສ້າງທາງລົດໄຟ ເຊິ່ງລວມທັງສ້າງທາງລົດໄຟ 10 ສາຍຈາກທາງດ່ຽວເປັນທາງລົດໄຟຄູ່; 24,69%ໃຊ້ເຂົ້າໃນການກໍ່ສ້າງໂຄງການທາງລົດໄຟໃນເມືອງ ໂດຍຕົ້ນຕໍຢູ່ນະຄອນຫຼວງບາງກອກ ແລະເຂດອ້ອມຂ້າງ; ຂະນະທີ່ອີກ 18,67%ໃຊ້ເຂົ້າໃນໂຄງການທາງຫຼວງ, ໂຄງການອື່ນໆລວມທັງການກໍ່ສ້າງສະຖານີບໍລິການຕ່າງໆຢູ່ຕາມທາງຫຼວງ.
ເພື່ອແກ້ໄຂສະພາບລົດຕິດຢູ່ນະຄອນຫຼວງບາງກອກ, ໃນຫຼາຍປີຜ່ານມານີ້, ລັດຖະບານໄທໄດ້ຊຸກຍູ້ການກໍ່ສ້າງທາງລົດໄຟໃນເມືອງຫຼາຍສາຍ. ແນວໃດກໍດີ, ທ່ານອາຄົມຍັງກ່າວວ່າ, ກາງປີນີ້, ໄທຍັງຈະເປີດບໍລິການບັດລົດເມທີ່ເປັນເອກະພາບກັນ ເພື່ອແກ້ໄຂບັນຫາບັດລົດເມ ແລະລົດໄຟໃນເມືອງທີ່ໃຊ້ຮ່ວມກັນບໍ່ໄດ້.