ຕາມຂ່າວສານຊິນຮວາ: ຮູບເງົາພາສາເປີເຊຍເລື່ອງ "ພະນັກງານຂາຍ" ທີ່ກຳກັບໂດຍທ່ານອາສຮາ ຟາຮາດີ ທີ່ມີຊື່ສຽງຂອງອີຣານໄດ້ຮັບລາງວັນຮູບເງົາພາສາຕ່າງປະເທດທີ່ດີເດັ່ນໃນການປະກວດລາງວັນອອສກາຄັ້ງທີ 89 ທີ່ຈັດຂຶ້ນໃນວັນທີ 26 ກຸມພານີ້, ແນວໃດກໍດີທ່ານອາສຮາ ຟາຮາດີບໍ່ໄດ້ມາຮັບລາງວັນ ຫຼັງທ່ານໂດນັນ ທຣຳ ປະທານາທິບໍດີອາເມລິກາໄດ້ເຊັນດຳລັດໃນທ້າຍເດືອນມັງກອນຜ່ານມາ ໂດຍຫ້າມບໍ່ໃຫ້ພົນລະເມືອງຂອງ 7 ປະເທດ ລວມທັງອີຣານເຂົ້າອາເມລິກາເປັນຊົ່ວຄາວ. ທັງນີ້ເຖິງວ່າດຳລັດດັ່ງກ່າວຖືກສານຕີຕົກ, ແຕ່ທ່ານຟາຮາດີຍັງປະຕິເສດບໍ່ເຂົ້າຮ່ວມງານ ເພື່ອເປັນການປະທ້ວງ.
ຕອນຄ່ຳມື້ດຽວກັນ, ຕົວແທນຂອງທ່ານຟາຮາດີໄດ້ຂຶ້ນເວທີແລະອ່ານຖະແຫຼງການຂອງທ່ານຟາຮາດີ ໂດຍກ່າວວ່າ "ຂ້າພະເຈົ້າຮູ້ສຶກເສຍດາຍທີ່ບໍ່ສາມາດຢູ່ຮ່ວມນຳພວກທ່ານໃນຕອນຄ່ຳມື້ນີ້ ແລະການທີ່ຂ້າພະເຈົ້າບໍ່ມາຮ່ວມກໍເພື່ອສະແດງຄວາມເຄົາລົບຕໍ່ປະຊາຊົນຂອງປະເທດຂ້ອຍແລະປະຊາຊົນອີກ 6 ປະເທດ ເຊິ່ງເຂົາເຈົ້າໄດ້ພົບເລື່ອງອັບປະຍົດຍ້ອນອາເມລິກາມີນະໂຍບາຍຫ້າມປະຊາຊົນປະເທດເຫຼົ່ານີ້ເຂົ້າປະເທດແບບໄຮ້ມະນຸດສະທຳ."