ວິທະຍຸສຽງອາເມລິກາລາຍງານໃນວັນທີ 27 ກຸມພານີ້ວ່າ, ຜົນການສຳຫຼວດຫຼ້າສຸດສະແດງໃຫ້ເຫັນວ່າ, ອັດຕາການສະໜັບສະໜູນທ່ານ ໂດນັນ ທຣຳ ປະທານາທິບໍດີອາເມລິກາ ຢູ່ໃນລະດັບຕ່ຳສຸດສຳລັບປະມຸກລັດຄົນໃໝ່ນັບແຕ່ໄດ້ສຳຫຼວດຄຳຄິດເຫັນຂອງປະຊາຊົນເປັນຕົ້ນມາ.
ບໍລິສັດ NBC ແລະໜັງສືພິມໂວສະຕຣິດລາຍວັນໄດ້ສຳເລັດການສຳຫຼວດຄຳຄິດເຫັນຂອງປະຊາຊົນໃນວັນອາທິດຜ່ານມາ ເຊິ່ງຜົນປາກົດວ່າ, ຊາວອາເມລິກາມີພຽງແຕ່ 44% ເທົ່ານັ້ນ ສະໜັບສະໜູນທ່ານ ທຣຳ, ຂະນະທີ່ອີກ 48% ບໍ່ສະໜັບສະໜູນ. ຜູ້ໃຫ້ສຳພາດ 1 ສ່ວນ 3 ກ່າວວ່າ, ການປະຕິບັດໜ້າທີ່ຂອງທ່ານ ທຣຳ ໃນໄລຍະຜ່ານມາສະແດງໃຫ້ເຫັນວ່າ, ທ່ານບໍ່ມີຄວາມເໝາະສົມກັບວຽກງານດັ່ງກ່າວ.
ຂະນະດຽວກັນ, ການສຳຫຼວດທີ່ຈັດຂຶ້ນສອງເທື່ອເມື່ອມໍ່ໆນີ້ ກໍມີຜົນຄ້າຍຄືກັນ ເຊິ່ງຜົນການສຳຫຼວດຂອງບໍລິສັດແກລຸບ ລະບຸວ່າ, ອັດຕາການສະໜັບສະໜູນ ສະເລ່ຍໃນເດືອນທຳອິດ 42%; ສ່ວນຜົນການສຳຫຼວດຂອງມະຫາວິທະຍາໄລຄວິນນິປຽກ ສະແດງໃຫ້ເຫັນວ່າ, ອັດຕາການສະໜັບສະໜູນ ມີພຽງແຕ່ 38%, ຂະນະທີ່ຜູ້ມີຄວາມເຫັນທາງລົບ ກວມ 55%.
 |
