ທ່ານ ພັ່ນກົ່ງເຊີ້ງ ຮອງຜູ້ວ່າການທະນາຄານປະຊາຊົນຈີນ ໄດ້ພົບປະກັບທ່ານ ຢັງປາວ ຈາມມິດ ຮອງຜູ້ອຳນວຍການບໍລິຫານງານລະດັບໂລກຂອງບໍລິສັດ ບລູມເບີກ ພ້ອມດ້ວຍຄະນະ ຢູ່ນະຄອນຫຼວງປັກກິ່ງເມື່ອບໍ່ດົນນີ້ ໂດຍສອງຝ່າຍໄດ້ແລກປ່ຽນຄວາມເຫັນກ່ຽວກັບບັນຫາການເປີດປະຕູສູ່ໂລກພາຍນອກຂອງຕະຫຼາດພັນທະບັດຈີນ.
ທ່ານ ຢັງປາວ ຈາມມິດ ກ່າວວ່າ, ບໍລິສັດບລູມເບີກໄດ້ພິຈາລະນາຄວາມເຫັນລວມຂອງນັກລົງທຶນຕ່າງປະເທດເປັນຈຳນວນຫຼາຍ ແລະຈະນຳສະເໜີຕົວເລກດັດຊະນີຜົນກຳລັງຄົງທີ່ບາໄຄລສ໌ບລູມເບີກທີ່ລວມທັງຕະຫຼາດພັນທະບັດຈີນສອງລາຍ ເຊິ່ງສະແດງໃຫ້ເຫັນເຖິງຄວາມໝັ້ນໃຈແລະເອົາໃຈໃສ່ຂອງນັກລົງທຶນຕ່າງປະເທດຕໍ່ເສດຖະກິດຈີນ, ຂະນະດຽວກັນກໍຈະດຶງດູດນັກລົງທຶນຕ່າງປະເທດຕິດຕາມແລະເຂົ້າໃຈຕະຫຼາດພັນທະບັດຈີນຫຼາຍກວ່າເກົ່າ. ພ້ອມນີ້, ບໍລິສັດບລູມເບີກ ຍັງຈະໃຊ້ມາດຕະການທີ່ຕັ້ງໜ້າ ເພື່ອສືບຕໍ່ໂຄສະນາຕະຫຼາດພັນທະບັດຈີນຕໍ່ນັກລົງທຶນຕ່າງປະເທດ.
ທ່ານ ພັ່ນກົ່ງເຊີ້ງ ກ່າວວ່າ, ຊົມເຊີຍແລະສະໜັບສະໜູນການເອົາຕະຫຼາດພັນທະບັດຂອງປະເທດຕົນເຂົ້າໃນຕົວເລກດັດຊະນີພັນທະບັດຕົ້ນຕໍຂອງໂລກ ເຊິ່ງການເຮັດແນວນີ້ ສາມາດສ່ອງແສງເຖິງສະພາບລວມຂອງຕະຫຼາດພັນທະບັດທົ່ວໂລກຢ່າງຖືກຕ້ອງກວ່າເກົ່າ ແລະມີຜົນດີຕໍ່ນັກລົງທຶນທົ່ວໂລກໃນການຈັດສັນຊັບສິນພັນທະບັດໄດ້ຢ່າງສົມເຫດສົມຜົນກວ່າເກົ່າ.