ໜັງສືພິມມະນີລາແທັມສ໌ຂອງຟິລິບປິນສະບັບວັນທີ 27 ກຸມພານີ້ ລາຍງານວ່າ, ທ່ານ ຈົ່ງຊ່ານ ລັດຖະມົນຕີກະຊວງການຄ້າຈີນຄົນໃໝ່ຈະຢ້ຽມຢາມປະເທດຕົນໃນເດືອນມີນາ ເພື່ອລົງນາມໃນສັນຍາໂຄງການຮ່ວມມືລະຫວ່າງສອງປະເທດ 40 ໂຄງການໂດຍມີມູນຄ້າຫຼາຍຕື້ໂດລາສະຫະລັດທີ່ຖືກເລື່ອນເວລາລົງນາມ.
ທ່ານ ໂຣມານາ ເອກອັກຄະລັດຖະທູດຟິລິບປິນປະຈຳຈີນ ໄດ້ເປີດເຜີຍແຜນການຢ້ຽມຢາມຫຼ້າສຸດດັ່ງກ່າວ ໃນກອງປະຊຸມເວທີປຶກສາຫາລືເສດຖະກິດການຄ້າແລະການລົງທຶນຈີນ-ຟິລິບປິນເມື່ອມໍ່ໆນີ້ວ່າ, ທ່ານ ຈົ່ງຊ່ານ ຈະຢ້ຽມຢາມປະເທດຕົນໃນວັນທີ 7 ມີນາໜ້ານີ້ ແລະເມື່ອຮອດເວລານັ້ນ, ສອງຝ່າຍຈະຈັດກອງປະຊຸມຂອງຄະນະກຳມະການເສດຖະກິດການຄ້າ ເພື່ອເຊັນສັນຍາຕາມແຜນທີ່ຈະລົງນາມໃນເມື່ອກ່ອນ.
ໜັງສືພິມດັ່ງກ່າວລາຍງານອີກວ່າ, ທ່ານ ຈ້າວຈ້ຽນຮວາ ເອກອັກຄະລັດຖະທູດຈີນປະຈຳຟິລິບປິນ ເປີດເຜີຍໃນກອງປະຊຸມເວທີປຶກສາຫາລືວ່າ, ສອງຝ່າຍຈະເລີ່ມຈັດຕັ້ງປະຕິບັດ 10 ກວ່າໂຄງການກ່ອນທ້າຍປີນີ້. ແນວໃດກໍດີ, ນີ້ແມ່ນສ່ວນສຳຄັນທີ່ສຸດໃນການຢ້ຽມຢາມຟິລິບປິນຂອງລັດຖະມົນຕີການຄ້າຄົນໃໝ່ຂອງຈີນ. ຂະນະດຽວກັນ, ຈີນພວມພິຈາລະນາສ້າງເຂດອຸດສາຫະກຳຢູ່ຟິລິບປິນ ເພື່ອຊ່ວຍ ພັດທະນາຂະແໜງການຜະລິດ ແລະສ້າງໂອກາດການປະກອບອາຊີບຫຼາຍກວ່າເກົ່າ.