ວິທະຍຸສາກົນແຫ່ງປະເທດຈີນລາຍງານວ່າ:ທະນາຄານກະສິກອນໄທໄດ້ເປີດບໍລິການຝາກເງິນແລະຊຳລະສະສາງດ້ວຍເງິນຕາ 13 ສະກຸນໃນວັນທີ 2 ມີນານີ້ເພື່ອບໍລິການຝາກເງິນແລະຊຳລະເງິນດ້ວຍສະກຸນເງິນຕາປະເທດຕົນໃຫ້ແກ່ລູກຄ້າຢູ່ພາກພື້ນ 10 ປະເທດອາຊຽນແລະຈີນ,ຍີ່ປຸ່ນ,ສ.ເກົາຫຼີໂດຍທະນາຄານນີ້ເປັນທະນາຄານແຫ່ງທຳອິດຂອງໄທທີ່ບໍລິການການຊຳລະສະສາງດ້ວຍເງິນຕາ 13 ສະກຸນ.
ທ່ານພັດທະຣາພົງ ກັນຫາສຸວັນ ຮອງຜູ້ອຳນວຍການໃຫຍ່ທະນາຄານກະສິກອນໄທເຫັນວ່າ,ຂະນະທີ່ຈີນຊຸກຍູ້ການປະຕິບັດນະໂຍບາຍ "ໜຶ່ງແລວທາງໜຶ່ງເສັ້ນທາງ",ມູນຄ່າການຄ້າລະຫວ່າງ 10 ປະເທດອາຊຽນແລະຈີນໄດ້ເພີ່ມຂຶ້ນຢ່າງພົ້ນເດັ່ນ,ຄວາມຕ້ອງການຊຳລະສະສາງດ້ວຍເງິນຢວນໃນຕະຫຼາດກໍເພີ່ມຂຶ້ນ.ຂະນະດຽວກັນ,ມູນຄ່າການຄ້າໃນແຕ່ລະປີລະຫວ່າງອາຊຽນແລະຈີນ,ຍີ່ປຸ່ນ,ສ.ເກົາຫຼີກໍບັນລຸຫຼາຍກວ່າ 6 ໝື່ນຕື້ບາດໂດຍສ່ວນຫຼາຍໄດ້ຊຳລະສະສາງດ້ວຍເງິນຕາສາກົນຕົ້ນຕໍເປັນຕົ້ນໂດລາສະຫະລັດ,ປອນອັງກິດແລະເອີໂຣ.ຈາກການທີ່ວິສາຫະກິດຕ້ອງແລກເງິນຫຼາຍເທື່ອ,ການເປີດບໍລິການເທື່ອນີ້ຈະສາມາດຫຼຸດຕົ້ນທຶນໃນການແລກເງິນດັ່ງກ່າວໃຫ້ໜ້ອຍລົງແລະເຮັດໃຫ້ການຊື້ຂາຍໄວຂຶ້ນຢ່າງຫຼວງຫຼາຍ.