ຕາມຂ່າວສານຊິນຮວາ: ທ່ານນາງຟູ້ຢິງ ໂຄສົກກອງປະຊຸມຄັ້ງທີ 5 ຂອງສະພາປະຊາຊົນແຫ່ງຊາດຈີນສະໄໝທີ 12 ກ່າວໃນພິທີຖະແຫຼງຂ່າວທີ່ຈັດຂຶ້ນໃນຕອນເຊົ້າວັນທີ 4 ມີນານີ້ວ່າ, ກອງປະຊຸມຄັ້ງນີ້ຈະເລີ່ມຂຶ້ນໃນຕອນເຊົ້າວັນທີ 5 ມີນາ ແລະອັດລົງໃນຕອນເຊົ້າວັນທີ 15 ມີນາ. ຕະຫຼອດໄລຍະກອງປະຊຸມ, ຈະຈັດພິທີຖະແຫຼງຂ່າວ 17 ເທື່ອຢູ່ສູນຂ່າວທີ່ໂຮງແຮມມີເຕຍ ແລະຈັດວາງໃຫ້ຜູ້ຮັບຜິດຊອບຂອງພາກສ່ວນທີ່ກ່ຽວຂ້ອງຕ່າງໆຕອບຄຳຖາມທີ່ຄົນທັງຫຼາຍສົນໃຈ ຕາມ "ທາງຍ່າງລັດຖະມົນຕີ" ກ່ອນກອງປະຊຸມຄົບຄະນະທຸກຄັ້ງ.
ທ່ານນາງຟູ້ຢິງກ່າວວ່າ, ກອງປະຊຸມມີວາລະປະຊຸມ 11 ລາຍ, ນອກຈາກສຳຫຼວດພິຈາລະນາແລະຜ່ານ 6 ບົດລາຍງານວຽກງານ ເປັນຕົ້ນ ບົດລາຍງານວຽກງານລັດຖະບານແລ້ວ, ຍັງສຳຫຼວດພິຈາລະນາຮ່າງກົດໝາຍແພ່ງ ແລະຍັດຕິກ່ຽວກັບການເລືອກຕັ້ງຜູ້ແທນສະພາປະຊາຊົນແຫ່ງຊາດຈີນສະໄໝທີ 13. ກອງປະຊຸມຈະປະຕິບັດຕາມນ້ຳໃຈ "ກົດເຫຼັກ 8 ຂໍ້" ຂອງສູນກາງພັກ ແລະຈັດກອງປະຊຸມແບບປະຢັດມັດທະຍັດ.
ທ່ານນາງຟູ້ຢິງກ່າວຕື່ມວ່າ, ພິທີປິດກອງປະຊຸມໃນຕອນເຊົ້າວັນທີ 15 ມີນາ, ທ່ານນາຍົກລັດຖະມົນຕີຫຼີເຄີ້ຊຽງຈະພົບປະນັກຂ່າວຈີນແລະຕ່າງປະເທດ. ກອງປະຊຸມຄົບຄະນະຈະເປີດເຜີຍຕໍ່ນັກຂ່າວຈີນແລະຕ່າງປະເທດ, ກອງປະຊຸມວົງແຄບຂອງຄະນະຜູ້ແທນຕ່າງໆກໍຈະໃຫ້ນັກຂ່າວໄປສຳພາດສ່ວນໜຶ່ງ.ໃນພິທີຖະແຫຼງຂ່າວທີ່ຈະຈັດຂຶ້ນຢູ່ສູນຂ່າວນັ້ນ, ປັດຈຸບັນມີຫົວໜ້າຄະນະກຳມະການພັດທະນາແລະປະຕິຮູບແຫ່ງລັດຈີນໃນວັນທີ 6 , ລັດຖະມົນຕີກະຊວງການເງິນຈັດຢູ່ໃນວັນທີ 7, ລັດຖະມົນຕີການຕ່າງປະເທດຈັດຢູ່ໃນວັນທີ 8, ລັດຖະມົນຕີກະຊວງອະນຸລັກສິ່ງແວດລ້ອມຈັດຂຶ້ນໃນວັນທີ 9 ແລະລັດຖະມົນຕີກະຊວງການຄ້າຈັດຂຶ້ນໃນວັນທີ 11.
ທ່ານນາງຟູ້ຢິງກ່າວຕື່ມວ່າ, ນັກຂ່າວທີ່ມາເອົາຂ່າວໃນກອງປະຊຸມມີ 3000 ກວ່າຄົນ, ໃນນັ້ນ, ມີນັກຂ່າວ 1500 ກວ່າຄົນມາຈາກຕ່າງປະເທດ.
 |
