CRI ລາຍງານວ່າ: ໃນໄລຍະດຳເນີນກອງປະຊຸມສອງສະພາຂອງຈີນ, ບຸກຄົນໃນວົງການການເມືອງແລະເສດຖະກິດຂອງໄທ ໄດ້ສົນໃຈຕໍ່ຈຸດຢືນແລະນະໂຍບາຍໃໝ່ຂອງລັດຖະບານຈີນ ໂດຍເຫັນວ່າ ຄຽງຄູ່ກັບການກໍ່ສ້າງໃນຂອບ "ໜຶ່ງແລວທາງໜຶ່ງເສັ້ນທາງ" ຄືບໜ້າຢ່າງບໍ່ຢຸດຢັ້ງ, ວິສາຫະກິດຂອງປະເທດຕົນກໍຈະມີໂອກາດໃນການພັດທະນາໃໝ່ຫຼາຍຂຶ້ນ.
ທັງນີ້, ທະນາຄານກະສິກອນໄທ ໄດ້ສ້າງຕັ້ງສາຂາສອງແຫ່ງຢູ່ຈີນແລ້ວ, ຂະນະທີ່ທ່ານ ພັດທະຣະພົງ ກັນຫາສຸວັນ ຮອງ CEO ບໍລິຫານງານທີ່ຮັບຜິດຊອບຕະຫຼາດຈີນແລະກິດຈະການໂລກ ຂອງທະນາຄານດັ່ງກ່າວ ກ່າວວ່າ: "ພວກຂ້າພະເຈົ້າຫວັງຢ່າງແຮງກ້າທີ່ຈະໄດ້ຮູ້ນະໂຍບາຍແລະນະໂຍບາຍໃໝ່ຂອງລັດຖະບານຈີນໃນກອງປະຊຸມສອງສະພາ. ຂະນະທີ່ປັດຈຸບັນ ຈີນກໍໄດ້ເຂົ້າສູ່ໄລຍະທີ່ເສດຖະກິດກ້າວເຂົ້າສູ່ສະພາວະປົກກະຕິໃໝ່ ໂດຍໃຫ້ຄວາມສຳຄັນຕໍ່ຄຸນນະພາບຂອງການເຕີບໂຕເສດຖະກິດຫຼາຍກວ່າ ສົ່ງຜົນເຮັດໃຫ້ພວກຂ້າພະເຈົ້າໄດ້ຮັບໂອກາດຢ່າງໃຫຍ່ຫຼວງ."
ໄທໄດ້ວາງຍຸດທະສາດໃໝ່ດ້ານການພັດທະນາເສດຖະກິດປະເທດຕົນ ໂດຍເຈົ້າໜ້າທີ່ລັດຖະບານ ລວມທັງທ່ານປຣະຍຸດ ຈັນໂອຊາ ນາຍົກລັດຖະມົນຕີ ກໍໄດ້ຢືນຢັນຈະຊຸກຍູ້ການເຊື່ອມຕໍ່ລະຫວ່າງຍຸດທະສາດການພັດທະນາເສດຖະກິດປະເທດຕົນກັບນະໂຍບາຍການພັດທະນາດ້ວຍການປະດິດສ້າງໃໝ່ ແລະ "ໜຶ່ງແລວທາງໜຶ່ງເສັ້ນທາງ" ຂອງຈີນ.
ທ່ານກອບສັກ ພູຕະກູນ ຮອງລັດຖະມົນຕີປະຈຳສຳນັກງານນາຍົກລັດຖະມົນຕີໄທ ກໍໄດ້ໃຫ້ສຳພາດນັກຂ່າວ ວິທະຍຸສາກົນແຫ່ງປະເທດຈີນ ຫຼື CRI ວ່າ: "ຂໍ້ລິເລີ່ມໜຶ່ງແລວທາງໜຶ່ງເສັ້ນທາງມີບົດບາດຕໍ່ອາຊຽນ ລວມທັງປະເທດຕົນ, ຈາກນີ້ ພວກຂ້າພະເຈົ້າຈຶ່ງຫວັງວ່າຈະມີວິສາຫະກິດຈີນໄປລົງທຶນຢູ່ປະເທດຕົນຫຼາຍຍິ່ງຂຶ້ນ ເພື່ອບັນລຸການຮ່ວມມືແບບຕ່າງຝ່າຍຕ່າງມີຜົນປະໂຫຍດ."
