ທ່ານຫຼີເຄີ້ສຽງ ນາຍົກລັດຖະມົນຕີຈີນ ໄດ້ຂຶ້ນຜ່ານບົດລາຍງານວຽກງານລັດຖະບານຕໍ່ກອງປະຊຸມສະພາປະຊາຊົນແຫ່ງຊາດໃນວັນທີ 5 ມີນານີ້ ໂດຍໄດ້ຍົກໃຫ້ເຫັນວ່າ: ການປະຕິບັດເປົ້າໝາຍສຳຄັນໃນການພັດທະນາເສດຖະກິດ-ສັງຄົມແຫ່ງຊາດໃນປີ 2016 ໄດ້ປະສົບຜົນສຳເລັດຢ່າງຈົບງາມ ແລະກໍເປັນການເລີ່ມຕົ້ນທີ່ດີໃນການປະຕິບັດ "ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 13".
ທ່ານຫຼີເຄີ້ສຽງ ກ່າວວ່າ: ໃນດ້ານເສດຖະກິດນັ້ນກໍສາມາດບັນລຸລວມຍອດຜະລິດຕະພັນພາຍໃນ ຫຼື GDP ເຖິງ 74400 ຕື້ຢວນ ເພີ່ມຂຶ້ນ 6,7% ເມື່ອທຽບໃສ່ປີ 2015 ແລະສາມາດປະກອບສ່ວນຕໍ່ອັດຕາການເຕີບໂຕຂອງເສດຖະກິດໂລກໄດ້ຫຼາຍກວ່າ 30%. ຂະນະທີ່ການໃຊ້ພະລັງງານຕໍ່ຫົວໜ່ວຍລວມຍອດຜະລິດຕະພັນພາຍໃນ ໄດ້ຫຼຸດລົງ 5%, ການພັດທະນາເສດຖະກິດມີຄຸນນະພາບແລະປະສິດທິພາບສູງຂຶ້ນຢ່າງຈະແຈ້ງ.
ສ່ວນການຫຼຸດຜ່ອນຄວາມທຸກຍາກນັ້ນ, ລັດຖະບານໄດ້ໃຊ້ງົບປະມານເພື່ອຫຼຸດຜ່ອນຄວາມທຸກຍາກໃນທົ່ວປະເທດຫຼາຍກວ່າ 100 ຕື້ຢວນ ສົ່ງຜົນເຮັດໃຫ້ປະຊາກອນຜູ້ທຸກຍາກໃນຊົນນະບົດໄດ້ຫຼຸດລົງ 12 ລ້ານ 4 ແສນຄົນ. ນອກຈາກນີ້, ກໍມີຜົນງານດ້ານອື່ນໆ ຢ່າງພົ້ນເດັ່ນຂຶ້ນເປັນຕົ້ນ ດ້ານການສຶກສາ, ລັດຖະບານໄດ້ອະນຸມັດງົບປະມານເຂົ້າໃນດ້ານນີ້ຫຼາຍກວ່າ 4% ຂອງ GDP ຢ່າງຕໍ່ເນື່ອງ. ຂະນະດຽວກັນ ກໍໄດ້ຍົກເວັ້ນຄ່າຮຽນຄ່າໃຊ້ຈ່າຍທົ່ວໄປໃຫ້ແກ່ນັກຮຽນມັດທະຍົມປາຍໃນຄອບຄົວທຸກຍາກຢູ່ຊົນນະບົດ, ທັງໄດ້ໃຫ້ທຶນຊ່ວຍເຫຼືອນັກຮຽນທຸກຍາກໃນໂຮງຮຽນ ຫຼື ມະຫາວິທະຍາໄລ ແລະ ສະຖາບັນການສຶກສາຊັ້ນສູງ ໃນປີ 2016 ຫຼາຍກວ່າ 84 ລ້ານເທື່ອຄົນ.
ນາຍົກລັດຖະມົນຕີຈີນ ກ່າວຕື່ມວ່າ: ປີຜ່ານມາ, ມີຜູ້ປະກອບອາຊີບເພີ່ມຂຶ້ນ 13 ລ້ານ 1 ແສນ 4 ໝື່ນກວ່າຄົນ, ຂະນະທີ່ຈຳນວນນັກສຶກສາທີ່ຮຽນຈົບແລະປະກອບອາຊີບກໍໄດ້ສ້າງສະຖິຕິໃໝ່ ນຳໄປສູ່ການເຮັດໃຫ້ອັດຕາວ່າງງານໃນຕົວເມືອງໄດ້ຫຼຸດລົງຢູ່ໃນລະດັບ 4,02% ເຊິ່ງເປັນລະດັບຕ່ຳສຸດເມື່ອທຽບໃສ່ຫຼາຍປີຜ່ານມາ. ເຊັ່ນດຽວກັນກັບດ້ານການທ່ອງທ່ຽວ ໂດຍສະເພາະການທ່ອງທ່ຽວພາຍໃນປະເທດໄດ້ເຕີບໂຕຢ່າງວ່ອງໄວ ແລະ ນັກທ່ອງທ່ຽວທີ່ໄປທ່ຽວຕ່າງປະເທດກໍບັນລຸຫຼາຍກວ່າ 120 ລ້ານເທື່ອຄົນ.
