ທ່ານຫຼີເຄີ້ສຽງ ນາຍົກລັດຖະມົນຕີຈີນ ໄດ້ຂຶ້ນຜ່ານບົດລາຍງານວຽກງານລັດຖະບານ ໃນວັນທີ 5 ມີນານີ້ ໂດຍສະເພາະການເປີດປະຕູສູ່ພາຍນອກ ວ່າ: ຈີນໄດ້ເຮັດວຽກນີ້ຢ່າງຕັ້ງໜ້າແລະເປັນເຈົ້າການເປີດກວ້າງດ້ວຍຜົນສຳເລັດ ແລະໃນຂະນະທີ່ຜະເຊີນກັບການປ່ຽນແປງໃໝ່ຂອງສະພາບການສາກົນ ແລະ ຄວາມຕ້ອງການໃໝ່ຂອງການພັດທະນາພາຍໃນປະເທດ, ຈີນຈະຕ້ອງໄດ້ປັບປຸງຍຸດທະສາດການເປີດປະຕູສູ່ພາຍນອກໃຫ້ສົມບູນຂຶ້ນຕື່ມອີກ ໂດຍການເລັ່ງສ້າງໂຄງປະກອບໃໝ່ດ້ານເສດຖະກິດແບບເປີດປະຕູ ແລະ ຊຸກຍູ້ຂະບວນການເປີດປະຕູໃຫ້ເຂົ້າສູ່ລວງເລິກ ແລະ ມີລະດັບສູງ ຍິ່ງໆຂຶ້ນ.
ນອກຈາກນີ້ ກໍຈະຊຸກຍູ້ການກໍ່ສ້າງໃນຂອບ "ໜຶ່ງແລວທາງໜຶ່ງເສັ້ນທາງ" ຢ່າງຈິງຈັງ, ຍຶດໝັ້ນການຮ່ວມປຶກສາຫາລື, ຮ່ວມກໍ່ສ້າງ ແລະ ຊົມໃຊ້ຜົນປະໂຫຍດຮ່ວມກັນ, ສ້າງກົນໄກຮ່ວມມືຜ່ານດ່ານຕາມ "ໜຶ່ງແລວທາງໜຶ່ງເສັ້ນທາງ", ສຸມໃສ່ປັບປຸງສະພາບແວດລ້ອມການລົງທຶນສຳລັບນັກລົງທຶນຕ່າງປະເທດໃຫ້ດີຂຶ້ນ, ສະໜັບສະໜູນວິສາຫະກິດທຶນຕ່າງປະເທດຈົດທະບຽນໃນຕະຫຼາດຫຼັກຊັບ ແລະ ຈຳໜ່າຍພັນທະບັດຢູ່ຈີນ. ຂະນະດຽວກັນກໍອະນຸຍາດໃຫ້ເຂົ້າຮ່ວມໂຄງການແຜນການວິທະຍາສາດເຕັກນິກລະດັບຊາດ ແລະ ຈະປະຕິບັດຕໍ່ວິສາຫະກິດພາຍໃນແລະຕ່າງປະເທດໃຫ້ເທົ່າທຽມກັນ ທັງໃນການອະນຸຍາດຄຸນວຸດທິ, ການກຳນົດມາດຕະຖານ ແລະ ການຈັດຊື້ຂອງລັດຖະບານ.
ນາຍົກລັດຖະມົນຕີຈີນ ກ່າວຕື່ມວ່າ: ເສດຖະກິດໂລກາພິວັດໃນປັດຈຸບັນ ລ້ວນແຕ່ສອດຄ່ອງກັບຜົນປະໂຫຍດພື້ນຖານຂອງປະເທດຕ່າງໆໃນໂລກ. ຂະນະທີ່ຈີນຈະເດັດດ່ຽວຊຸກຍູ້ການຮ່ວມມືດ້ານເສດຖະກິດທົ່ວໂລກ, ປົກປ້ອງຖານະຊ່ອງທາງຕົ້ນຕໍຂອງໂຄງປະກອບການຄ້າຫຼາຍຝ່າຍ, ຕັ້ງໜ້າເຂົ້າຮ່ວມເຈລະຈາການຄ້າຫຼາຍຝ່າຍ, ຊຸກຍູ້ອະນຸສັນຍາການຍົກລະດັບເຂດການຄ້າເສລີຈີນ-ອາຊຽນໃຫ້ມີຜົນສັກສິດແລະໄດ້ຮັບການຈັດຕັ້ງປະຕິບັດຢ່າງຮອບດ້ານ, ເຈລະຈາສັນຍາການພົວພັນຄູ່ຮ່ວມເສດຖະກິດຮອບດ້ານໃນພາກພື້ນໃຫ້ສຳເລັດໂດຍໄວ, ຊຸກຍູ້ການສ້າງເຂດການຄ້າເສລີອາຊີປາຊີຟິກ. ແນວໃດກໍດີ, ຈີນແມ່ນປະເທດທີ່ມີຄວາມຮັບຜິດຊອບ ແລະຈັດຕັ້ງປະຕິບັດຫຼັງໄດ້ສັນຍາໄວ້ຢ່າງຕັ້ງໜ້າມາໂດຍຕະຫຼອດ, ຂະນະດຽວກັນກໍຈະເດັດດ່ຽວປົກປັກຮັກສາສິດແລະຜົນປະໂຫຍດຕາມທາງສົມຄວນຂອງຕົນ.