ທ່ານຫຼີເຄີ້ສຽງ ນາຍົກລັດຖະມົນຕີຈີນກ່າວໃນບົດລາຍງານວຽກງານລັດຖະບານປີ 2017 ວ່າ: ຄາດໝາຍການພັດທະນາປີນີ້ ກໍຄື ລວມຍອດຜະລິດຕະພັນພາຍໃນ ຫຼື GDP ຈະໃຫ້ເພີ່ມຂຶ້ນປະມານ 6,5%. ຂະນະທີ່ທ່ານຈ່າງຢິ້ນຫຼິງ ສະມາຊິກສະພາປຶກສາການເມືອງປະຊາຊົນແຫ່ງຊາດ, ສະມາຊິກສະຖາບັນວິທະຍາສາດ-ສັງຄົມແຫ່ງຊາດຈີນ ກໍກ່າວວ່າ: ເສດຖະກິດຈີນຮັກສາການພັດທະນາຢ່າງໜັກແໜ້ນຈະເປັນປັດໄຈສຳຄັນເຮັດໃຫ້ຈີນແລະອາຊຽນຮັກສາແລະເປີດກວ້າງການພົວພັນຮ່ວມມືກັນໃນພາກພື້ນ.
ທ່ານຈ່າງຢິ້ນຫຼິງ ກ່າວວ່າ: ຈີນແມ່ນຕະຫຼາດການຄ້າໃຫຍ່ອັນດັບໜຶ່ງຂອງອາຊຽນ ແລະການພັດທະນາອາຊຽນກໍໄດ້ອາໄສການຄ້າແລະການລົງທຶນຂອງຈີນຫຼາຍສົມຄວນ. ສະນັ້ນ, ການທີ່ຈີນຮັກສາສະພາບການເຕີບໂຕຢ່າງໜັກແໜ້ນໄດ້ເປັນຜົນທີ່ດີທີ່ສຸດຕໍ່ອາຊຽນ. ແນວໃດກໍດີ, ການທີ່ຈີນສືບຕໍ່ເດີນຕາມເສັ້ນທາງພັດທະນາທີ່ເປີດກວ້າງ, ການຍົກລະດັບເຂດການຄ້າເສລີຈີນ-ອາຊຽນ, ການເລັ່ງເຈລະຈາການພົວພັນຄູ່ຮ່ວມເສດຖະກິດສັງລວມພາກພື້ນ ຫຼື RECP ໃຫ້ໄວຂຶ້ນ, ການເພີ່ມທະວີການກໍ່ສ້າງໃນຂອບ "ໜຶ່ງແລວທາງໜຶ່ງເສັ້ນທາງ" ແລະອື່ນໆ ທີ່ໄດ້ກຳນົດໃນບົດລາຍງານວຽກງານລັດຖະບານນັ້ນ ລ້ວນແຕ່ມີສ່ວນກ່ຽວພັນກັບອາຊຽນຢ່າງແໜ້ນແຟ້ນ ເຊິ່ງຈະເປັນການຊຸກຍູ້ການຮ່ວມມືລະຫວ່າງຈີນ-ອາຊຽນໃຫ້ເຂົ້າສູ່ລວງເລິກຕື່ມອີກ.
