ທ່ານວິກຕໍ ໂອເຊຣົຟ ປະທານຄະນະກຳມາທິການການປ້ອງກັນປະເທດແລະຄວາມໝັ້ນຄົງ ສະພາສູງຣັດເຊຍ ກ່າວໃນວັນທີ 7 ມີນານີ້ວ່າ: ການທີ່ອາເມລິກາຕິດຕັ້ງລະບົບຕ້ານຂີປະນາວຸດ THAAD ຢູ່ ສ.ເກົາຫຼີ ນັ້ນ ເປັນການລະເມີດສົນທິສັນຍາການຫຼຸດອາວຸດຍຸດທະສາດສະບັບໃໝ່ລະຫວ່າງຣັດເຊຍແລະອາເມລິກາ.
ທ່ານໂອເຊຣົຟ ກ່າວຕື່ມວ່າ: ການຕິດຕັ້ງລະບົບດັ່ງກ່າວສົ່ງຜົນເຮັດໃຫ້ປະເທດຕົນປະເຊີນກັບສິ່ງທ້າທາຍໃໝ່, ຂະນະທີ່ການກະທຳຂອງອາ ເມລິກາ ໄດ້ລະເມີດມາດຕາການຮັກສາອາວຸດຍຸດທະສາດໃຫ້ກ້ຳເກິ່ງກັນ ທີ່ໄດ້ລະບຸໄວ້ໃນສົນທິສັນຍາການຫຼຸດອາວຸດຍຸດທະສາດສະບັບໃໝ່.
ທ່ານໂອເຊຣົຟ ເນັ້ນວ່າ: ປະເທດຕົນຈະບໍ່ຖອນອອກຈາກສົນທິສັນຍາດັ່ງກ່າວ, ແຕ່ກໍຈະວິເຄາະສະຖານະການໃນປັດຈຸບັນຕາມລະດັບໄພຂົ່ມຂູ່ຈາກການຕິດຕັ້ງລະບົບຕ້ານຂີປະນາວຸດ THAAD ຢູ່ ສ.ເກົາຫຼີ ຂອງອາເມລິກາ.
