ທ່ານ ວາງຢີ້ ລັດຖະມົນຕີກະຊວງການຕ່າງປະເທດຈີນ ໄດ້ຕອບຄຳຖາມຂອງນັກຂ່າວຈີນແລະຕ່າງປະເທດກ່ຽວກັບ 'ນະໂຍບາຍການຕ່າງປະເທດ ແລະການພົວພັນກັບພາຍນອກຂອງຈີນ'.
ເມື່ອກ່າວເຖິງເວທີປຶກສາຫາລືສຸດຍອດການຮ່ວມມືສາກົນ 'ໜຶ່ງແລວທາງໜຶ່ງເສັ້ນທາງ' ທີ່ຈີນຈະຈັດຂຶ້ນໃນເດືອນພຶດສະພາປີນີ້ນັ້ນ, ທ່ານ ວາງຢີ້ ກ່າວວ່າ, ຈະມີປະມຸກລັດຫຼືຫົວໜ້າລັດຖະບານ 20 ກວ່າທ່ານ, ຜູ້ຮັບຜິດຊອບອົງການຈັດຕັ້ງສາກົນ 50 ກວ່າທ່ານ, ຜູ້ຕາງໜ້າຂັ້ນລັດຖະມົນຕີ 100 ກວ່າທ່ານ ພ້ອມດ້ວຍແຂກຜູ້ມີກຽດຈາກປະເທດແລະເຂດແຄວ້ນຕ່າງໆໃນໂລກລວມ 1200 ກວ່າທ່ານເຂົ້າຮ່ວມ.
ທ່ານ ວາງຢີ້ ກ່າວຕື່ມວ່າ, ເມື່ອເຖິງເວລານັ້ນ, 'ໜຶ່ງແລວທາງໜຶ່ງເສັ້ນທາງ' ຈະສືບຕໍ່ເປັນຫົວຂໍ້ທີ່ສົນໃຈຂອງໂລກ ແລະພວກເຮົາກໍຫວັງວ່າ ເວທີປຶກສາຫາລືດັ່ງກ່າວຈະໄດ້ຮັບໝາກຜົນສາມດ້ານຄື: ໜຶ່ງ, ສາມາດເຕົ້າໂຮມຄວາມເຫັນເອກະພາບກັນຂອງທຸກຝ່າຍ, ເຊື່ອມຕໍ່ຍຸດທະສາດພັດທະນາຂອງທຸກປະເທດ ແລະກຳນົດທິດທາງໃຫຍ່ເພື່ອເຮັດໃຫ້ທ່າແຮງຂອງທຸກຝ່າຍຊ່ວຍຊູຍູ້ໜູນກັນ ແລະບັນລຸຄວາມຈະເລີນຮຸ່ງເຮືອງພ້ອມກັນ. ສອງ, ສາມາດກຳນົດການຮ່ວມມືໃນຂົງເຂດຕົ້ນຕໍ, ກຳນົດໂຄງການຮ່ວມມືຂະໜາດໃຫຍ່ຈຳນວນໜຶ່ງໂດຍປິ່ນອ້ອມການເຊື່ອມຈອດດ້ານພື້ນຖານໂຄງລ່າງ, ການຄ້າການລົງທຶນ, ການສະໜັບສະໜູນດ້ານການທະນາຄານ ແລະການໄປມາຫາສູ່ກັນລະຫວ່າງບຸກຄົນ ແລະສາມ, ສາມາດສະເໜີມາດຕະການຮ່ວມມືໄລຍະກາງແລະຍາວ, ຂຸດຄົ້ນກົນໄກຮ່ວມມືທີ່ມີຜົນຢ່າງຖາວອນໃນການຮ່ວມກັນສ້າງ 'ໜຶ່ງແລວທາງໜຶ່ງເສັ້ນທາງ' ແລະສ້າງເຄືອຂ່າຍການພົວພັນຄູ່ຮ່ວມທີ່ແໜ້ນແຟ້ນແລະແທດເໝາະກັບຕົວຈິງກວ່າເກົ່າ.
 |
