ກອງປະຊຸມເທື່ອທີ 5 ຂອງສະພາປະຊາຊົນແຫ່ງຊາດຈີນຊຸດທີ 12 ໄດ້ຈັດກອງປະຊຸມຄົບຄະນະເທື່ອທີ 2 ຢູ່ຫໍສະພາປະຊາຊົນແຫ່ງຊາດຈີນທີ່ນະຄອນຫຼວງປັກກິ່ງໃນຕອນບ່າຍວັນທີ 8 ມີນານີ້ໂດຍໄດ້ຮັບການມອບໝາຍຈາກຄະນະປະຈຳສະພາປະຊາຊົນແຫ່ງຊາດຈີນ, ທ່ານຈ່າງເຕີຈ່ຽງ ປະທານສະພາປະຊາຊົນແຫ່ງຊາດຈີນໄດ້ລາຍງານວຽກງານຕໍ່ກອງປະຊຸມ.
ທ່ານຈ່າງເຕີຈ່ຽງຢືນຢັນວ່າ ໃນໜຶ່ງປີຜ່ານມາ, ຄະນະປະຈຳສະພາປະຊາຊົນແຫ່ງຊາດໄດ້ຍຶດໝັ້ນການສ້າງກົດໝາຍເປັນວຽກງານບຸລິມະສິດໂດຍເນັ້ນຄຸນນະພາບເປັນສຳຄັນແລະກໍໄດ້ປະກາດໃຊ້ກົດໝາຍສຳຄັນຈຳນວນໜຶ່ງ. ຄະນະປະຈຳສະພາເອົາໃຈໃສ່ປະຕິບັດສິດຕິດຕາມກວດກາຕາມທີ່ລະບຸໄວ້ໃນລັດຖະທຳມະນູນ, ຍຶດໝັ້ນການແກ້ໄຂບັນຫາເປັນເປົ້າໝາຍ, ເພີ່ມຄວາມເຂັ້ມງວດໃນການຕິດຕາມກວດກາ, ປະດິດສ້າງຮູບການຕິດຕາມກວດກາແລະເພີ່ມທະວີການຕິດຕາມກວດກາໃຫ້ມີປະສິດທິຜົນຕົວຈິງຫຼາຍຂຶ້ນ.
ທ່ານຈ່າງເຕີຈ່ຽງກ່າວຕື່ມວ່າ: ປີ 2017 ເປັນປີສຳຄັນແຫ່ງການຈັດຕັ້ງປະຕິບັດແຜນພັດທະນາເສດຖະກິດແຫ່ງຊາດ 5 ປີຄັ້ງທີ 13 ແລະສ້າງສັງຄົມອີ່ມໜຳສຳລານໃຫ້ສຳເລັດຜົນຢ່າງຮອບດ້ານເຊິ່ງໜ້າທີ່ວຽກງານຂອງຄະນະປະຈຳສະພາປະຊາຊົນແຫ່ງຊາດຈີນຈະເນັ້ນ 5 ດ້ານຄື
ໜຶ່ງ, ສົ່ງເສີມການພັດທະນາດ້ວຍກົດໝາຍທີ່ດີແລະຮັບປະກັນການຄຸ້ມຄອງທີ່ດີ. ສອງ, ປະຕິບັດການຕິດຕາມກວດກາຢ່າງຖືກຕ້ອງແລະມີປະສິດທິຜົນ. ສາມ, ເອົາໃຈໃສ່ປະຕິບັດວຽກງານການເລືອກຕັ້ງຜູ້ແທນສະພາປະຊາຊົນໃຫ້ດີ. ສີ່, ເພີ່ມທະວີການປັບປຸງວຽກງານຂອງຜູ້ແທນໃຫ້ດີແລະຫ້າ, ຈັດຕັ້ງປະຕິບັດວຽກງານອື່ນໆໃຫ້ເປັນເອກະພາບກັນແລະມີປະສິດທິຜົນດີ.
 |
