ສານລັດຖະທຳມະນູນ ສ.ເກົາຫຼີ ໄດ້ໄຂກອງປະຊຸມຜູ້ພິພາກສາໃນຕອນບ່າຍວັນທີ 8 ມີນານີ້ ໂດຍໄດ້ຕົກລົງຈະຕັດສິນຄະດີຖອດຖອນປະທານາທິບໍດີໃນເວລາ 11:00 ໂມງຂອງວັນທີ 10 ເດືອນນີ້.
ປັດຈຸບັນ, ສານລັດຖະທຳມະນູນມີຜູ້ພິພາກສາ 8 ທ່ານ ແລະຖ້າມີ 6 ທ່ານເຫັນດີ ກໍໝາຍຄວາມວ່າ ທ່ານນາງປັກກຸນເຮ ຈະຖືກປົດອອກຈາກຕຳແໜ່ງປະທານາທິບໍດີທັນທີ ແລະຈະກາຍເປັນປະທານາທິບໍດີຜູ້ທຳອິດທີ່ຖືກຖອດຖອນໃນປະຫວັດສາດ ສ.ເກົາຫຼີ ແລະຈາກນັ້ນ ການເລືອກຕັ້ງທົ່ວໄປກໍຈະດຳເນີນພາຍໃນ 60 ວັນ. ຂະນະທີ່ຖ້າຄະດີຖອດຖອນຖືກຕີກັບ, ທ່ານນາງປັກກຸນເຮ ກໍຈະສາມາດດຳລົງຕຳແໜ່ງປະທານາທິບໍດີຕໍ່ໄດ້ອີກ. ແນວໃດກໍດີ, ສານລັດຖະທຳມະນູນ ຢືນຢັນວ່າ: ເມື່ອພິຈາລະນາເຖິງຄວາມສົນໃຈສູງຂອງປະຊາຊົນທົ່ວປະເທດຕໍ່ຄະດີຖອດຖອນປະທານາທິບໍດີ ຈຶ່ງໄດ້ອະນຸມັດໃຫ້ຖ່າຍທອດສົດຂະບວນການຕັດສິນດັ່ງກ່າວ.
ຄະນະກວດສອບພິເສດເຫດການນາງຊອຍຊຸນຊິວເຂົ້າແຊກແຊງວຽກງານການບໍລິຫານລັດ ໄດ້ປະກາດຜົນການກວດສອບຂັ້ນສຸດທ້າຍໃນວັນທີ 6 ມີນານີ້ ໂດຍໄດ້ກ່າວຟ້ອງທ່ານນາງປັກກຸນເຮໃນຂໍ້ຫາຮັບສິນບົນ, ໃຊ້ສິດອຳນາດໃນທາງບໍ່ຖືກຕ້ອງ ແລະອື່ນໆ ລວມທັງໝົດ 13 ຂໍ້ ທັງໄດ້ມອບຂໍ້ມູນການກວດສອບໃຫ້ເຈົ້າໜ້າທີ່ໄອຍະການແລ້ວ.
