ໃນການຖະແຫຼງຂ່າວທີ່ກະຊວງການຕ່າງປະເທດຈີນຈັດຂຶ້ນໃນວັນທີ 9 ມີນານີ້, ມີນັກຂ່າວຖາມວ່າ: ຫວ່າງມໍ່ໆນີ້ ຢູ່ມຽນມາເຂດໃກ້ຊາຍແດນຕິດກັບຈີນ ໄດ້ເກີດການປະທະກັນອີກ, ຈີນຈະມີການຕອບໂຕ້ແນວໃດຕໍ່ເລື່ອງນີ້? ນອກນີ້ ຕາມຂ່າວແຈ້ງວ່າມີປະຊາຊົນມຽນມາເປັນໝື່ນຄົນໄດ້ຫຼັ່ງໄຫຼເຂົ້າຈີນເພື່ອລີ້ໄພສົງຄາມ ເຊິ່ງຈີນຈະຈັດສັນຊາວມຽນມາເຫຼົ່ານີ້ແນວໃດ?
ທ່ານເກິງສວງ ໂຄສົກກະຊວງການຕ່າງປະເທດຈີນຕອບຄຳຖາມດັ່ງກ່າວວ່າ: ຫວ່າງບໍ່ດົນມານີ້ ຢູ່ພາກເໜືອມຽນມາໄດ້ເກີດການປະທະກັນທາງການທະຫານ, ສົ່ງຜົນເຮັດໃຫ້ປະຊາຊົນເສຍຊີວິດແລະບາດເຈັບຢ່າງຫຼວງຫຼາຍ, ຂະນະທີ່ຈີນກໍປະນາມການປະທະກັນໃນປະເທດດັ່ງກ່າວທີ່ສ້າງຜົນເສຍຫາຍແກ່ປະຊາຊົນຜູ້ບໍລິສຸດ. ຫຼັງເກີດການປະທະກັນ, ມີຊາວມຽນມາກວ່າ 20.000 ຄົນໄດ້ຫຼັ່ງໄຫຼເຂົ້າຈີນເພື່ອລີ້ໄພສົງຄາມ, ຂະນະທີ່ຈີນກໍໄດ້ຈັດສັນ ແລະ ຊ່ວຍຜູ້ລີ້ໄພດັ່ງກ່າວທາງມະນຸດສະທຳ ທັງໃຊ້ມາດຕະການຢ່າງມີປະສິດທິຜົນເພື່ອປົກປ້ອງຄວາມສະຫງົບຕາມເຂດຊາຍແດນປະເທດຕົນ.
ທ່ານເກິງສວງ ກ່າວຕື່ມວ່າ: ສະຖານະການຢູ່ມຽນມາໄດ້ກ່ຽວພັນເຖິງສັນຕິພາບແລະຄວາມສະຫງົບຕາມຊາຍແດນຈີນ-ມຽນມາ ແລະຈີນກໍໄດ້ສົນໃຈຢ່າງສູງ, ທັງຮຽກຮ້ອງໃຫ້ຝ່າຍຕ່າງໆທີ່ກ່ຽວຂ້ອງຈົ່ງຮັກສາຄວາມອົດກັ້ນໄວ້ ແລະຢຸດການປະທະກັນທັນທີ ເພື່ອປ້ອງກັນບໍ່ໃຫ້ການປະທະກັນດຸເດືອດຍິ່ງຂຶ້ນ, ພ້ອມກັນນັ້ນກໍໃຊ້ມາດຕະການທີ່ມີປະສິດທິຜົນເພື່ອຟື້ນຟູສັນຕິພາບແລະສະຖຽນລະພາບຢູ່ຕາມເຂດຊາຍແດນໂດຍໄວ.